Read nynorsk 1978 4. Mosebok 3 Bible Online

4. Mosebok 3 - nynorsk 1978 bible

4. Mosebok 3

¹Dette er ætta åt Aron og Moses, som ho var den tid Herren tala til Moses på Sinai-fjellet.

²Aron hadde desse sønene: Den eldste heitte Nadab; så kom Abihu, Elasar og Itamar.

³Det er namna på Arons-sønene, dei som var salva til prestar og vigde til å gjera presteteneste.

⁴Nadab og Abihu døydde i Sinai-øydemarka medan dei stod for Herrens åsyn; for dei hadde bore uvigsla eld fram for han. Dei hadde ingen søner. Sidan gjorde Elasar og Itamar presteteneste under Aron, far sin.

⁵Herren sa til Moses:

⁶Lat Levi-ætta koma hit! Lat dei gå fram for Aron, presten, og tena han!

⁷Dei skal gjera teneste framfor møteteltet både for Aron og for heile Israels-lyden og gjera det arbeidet som skal gjerast ved heilagdomen.

⁸Dei skal ta vare på alt det som høyrer til i møteteltet. Såleis skal dei tena israelittane og gjera det arbeidet som skal gjerast ved heilagdomen.

⁹Gjev levittane over til Aron og sønene hans. Dei er dei einaste av israelittane som skal gjevast over til han.

¹⁰Aron og sønene hans skal du setja til å gjera presteteneste. Kjem nokon annan nær det heilage, skal han døy.

¹¹Så sa Herren til Moses:

¹²Sjå, levittane har eg teke ut mellom israelittane i staden for alle fyrstefødde i Israel, dei som kjem fyrst frå mors liv. Og levittane skal høyra meg til.

¹³For eg skal ha alt fyrstefødt. Den dagen eg slo i hel alle dei fyrstefødde i Egypt, fastsette eg at alt fyrstefødt i Israel, både av menneske og dyr, skal viast til meg. Det skal høyra meg til. Eg er Herren.

¹⁴Herren tala atter til Moses i Sinai-øydemarka og sa:

¹⁵«Du skal mønstra levittane, ætt for ætt og ættgrein for ættgrein. Alle menn og alle gutar som er ein månad eller meir, skal du mønstra.»

¹⁶Så mønstra Moses dei på Herrens ord, som han var føresagd.

¹⁷Dette er namna på sønene til Levi: Gersjon, Kehat og Merari.

¹⁸Sønene til Gersjon og ættene deira heitte Libni og Sjimi.

¹⁹Sønene til Kehat og ættene deira var Amram, Jishar, Hebron og Ussiel.

²⁰Sønene til Merari og ættene deira var Makli og Musji. Dette er Levi-ættene og ættgreinene deira.

²¹Til Gersjon høyrde Libni-ætta og Sjimi-ætta. Det er Gersjon-ættene.

²²Då dei vart mønstra, alle menn og alle gutar som var ein månad eller meir, var det 7 500 som vart innskrivne i manntalet.

²³Gersjon-ættene hadde leiren sin bak heilagdomen, mot vest.

²⁴Hovdingen over Gersjon-greina var Eljasaf, son til Lael.

²⁵Det Gersjon-sønene skulle ta seg av i samband med møteteltet, var sjølve heilagdomen, teltet, taket på det og teppet for møteteltdøra,

²⁶omhenget rundt føregarden som låg kring heilagdomen og altaret, teppet for døra inn til føregarden, snorene og alt arbeidet som fylgde med dette.

²⁷Til Kehat høyrde Amram-ætta, Jishar-ætta, Hebron-ætta og Ussiel-ætta. Det er Kehat-ættene.

²⁸Då det vart halde manntal over alle menn og alle gutar som var ein månad eller meir, var det 8 600 mann som skulle gjera teneste ved heilagdomen.

²⁹Kehat-ættene hadde leiren sin på sørsida av heilagdomen.

³⁰Hovdingen over Kehat-greina var Elisafan, son til Ussiel.

³¹Det dei skulle ta seg av, var paktkista, bordet, ljosestaken, altara, dei heilage reiskapane som vart nytta i gudstenesta, og teppet og alt arbeidet som fylgde med.

³²Den øvste hovdingen over levittane var Elasar, son til Aron, presten. Han hadde tilsyn med dei som gjorde teneste ved heilagdomen.

³³Til Merari høyrde Makli-ætta og Musji-ætta. Det er Merari-ættene.

³⁴Då dei vart mønstra, alle menn og alle gutar som var ein månad eller meir, var det 6 200 som vart innskrivne i manntalet.

³⁵Hovdingen over Merari-greina var Suriel, son til Abihajil. Dei hadde leiren sin på nordsida av heilagdomen.

³⁶Merari-sønene var sette til å ta seg av plankane i møteteltet, tverrstengene, stolpane og fotstykka, alle reiskapane der og alt arbeidet som fylgde med,

³⁷og stolpane kring føregarden med fotstykka, pluggane og snorene som høyrde til.

³⁸På austsida av heilagdomen, framfor den delen av møteteltet som vender mot soloppgangen, hadde Moses og Aron og sønene hans leiren sin. Dei tok seg av tenesta ved heilagdomen for israelittane. Kom ein annan nær det heilage, laut han døy.

³⁹Talet på dei levittane som vart mønstra, mønstra av Moses og Aron på Herrens ord, ætt for ætt, alle menn og alle gutar som var ein månad eller meir, var i alt 22 000.

⁴⁰Herren sa til Moses: Du skal mønstra dei fyrstefødde i Israel, alle menn og alle gutar som er ein månad eller meir, og skriva dei inn i manntalet.

⁴¹Lat så meg, Herren, få levittane i staden for alle dei fyrstefødde mellom israelittane, og feet åt levittane i staden for alt det fyrstefødde feet hjå israelittane.

⁴²Moses gjorde som Herren hadde sagt, og mønstra alle fyrstefødde hjå israelittane.

⁴³Talet på dei fyrstefødde som vart mønstra og innskrivne i manntalet, alle menn og alle gutar som var ein månad eller meir, var i alt 22 273.

⁴⁴Så sa Herren til Moses:

⁴⁵Ta levittane i staden for alle dei fyrstefødde mellom israelittane, og feet åt levittane i staden for feet deira. Levittane skal høyra meg, Herren, til.

⁴⁶Men i løysepengar for dei 273 fyrstefødde mellom israelittane som går ut over talet på levittar,

⁴⁷skal du ta fem sekel for kvar, etter den vekt dei nyttar i heilagdomen, der ein sekel er tjue gera.

⁴⁸Desse pengane skal du gje Aron og sønene hans til utløysing av dei israelittane som er over talet.

⁴⁹Så fekk Moses løysepengane for dei fyrstefødde mellom israelittane som var att då dei andre var utløyste med levittane.

⁵⁰Hjå dei fyrstefødde mellom israelittane fekk han pengane, 1 365 sekel etter den vekt dei nyttar i heilagdomen.

⁵¹Og etter Herrens ord gav Moses løysepengane til Aron og sønene hans. Moses gjorde som Herren hadde sagt.