Read nynorsk 1978 4. Mosebok 34 Bible Online

4. Mosebok 34 - nynorsk 1978 bible

4. Mosebok 34

¹Herren sa til Moses:

²Tal til israelittane og sei til dei: Når de kjem inn i Kanaan, det landet de får til odel og eige, skal det ha desse grensene:

³Grensa i sør skal gå frå Sin-øydemarka langsmed Edom. I aust skal sørgrensa gå ut frå enden av Saltsjøen. [57]

⁴Ho skal svinga sørom Akrabbim-skaret og halda fram til Sin. Så skal ho gå sør for Kadesj-Barnea til Hasar-Addar og derifrå til Asmon. [58]

⁵Frå Asmon skal grensa svinga ned til Egyptarbekken og ut til havet i vest. [59]

⁶I vest skal de ha Storhavet til grense; det skal vera grensa dykkar mot vest.

⁷I nord skal dette vera grensa dykkar: Frå Storhavet skal de dra opp ei line til Hor-fjellet [60]

⁸og frå Hor-fjellet til Lebo-Hamat; der skal grensa nå ut til Sedad.

⁹Så skal ho halda fram til Sifron og enda ved Hasar-Enan. Det skal vera grensa dykkar mot nord.

¹⁰I aust skal de dra opp ei line frå Hasar-Enan til Sjefam.

¹¹Frå Sjefam skal grensa gå ned til Ribla, austanfor Ajin, og så nedover til ho når fjellryggen på austsida av Gennesaret-sjøen.

¹²Så skal ho fylgja Jordan og enda nedmed Saltsjøen. Det skal vera landet dykkar, og desse grensene skal det ha.

¹³Moses tala til israelittane og sa: Dette er det landet de skal få til odel og eige og dela ved loddkasting, det landet som Herren har sagt at dei ni ættene og den eine halve ætta skal få.

¹⁴For Rubens-ætta, Gads-ætta og halvparten av Manasse-ætta har alt fått odelsjord til ættgreinene sine.

¹⁵Desse to og ei halv ættene har fått sin eigedom på austsida av Jordan, mot solrenninga, midt for Jeriko.

¹⁶Herren sa til Moses:

¹⁷Dette er namna på dei mennene som skal skifta ut landet mellom dykk: presten Elasar, Josva Nunsson

¹⁸og så ein hovding for kvar ætt, som de skal velja til utskiftingsmenn.

¹⁹Her er namna på desse mennene: for Juda-ætta Kaleb, son til Jefunne;

²⁰for Simeons-ætta Samuel, son til Ammihud;

²¹for Benjamins-ætta Elidad, son til Kislon;

²²for Dans-ætta ein hovding, Bukki, son til Jogli;

²³for Josefs-sønene ein hovding av Manasse-ætta, Hanniel, son til Efod,

²⁴og ein hovding av Efraims-ætta, Kemuel, son til Sjiftan;

²⁵for Sebulons-ætta ein hovding, Elisafan, son til Parnak;

²⁶for Jissakars-ætta ein hovding, Paltiel, son til Assan;

²⁷for Asjers-ætta ein hovding, Akihud, son til Sjelomi,

²⁸og for Naftali-ætta ein hovding, Peda’el, son til Ammihud.

²⁹Det var dei mennene Herren sette til å skifta ut Kanaan-landet mellom israelittane.