Read nynorsk 1978 4. Mosebok 7 Bible Online

4. Mosebok 7 - nynorsk 1978 bible

4. Mosebok 7

¹Då Moses var ferdig med å reisa heilagdomen, då han hadde salva og vigsla han og alt utstyret der og like eins hadde salva og vigsla altaret med alt det som høyrer til,

²då kom Israels hovdingar fram, dei som var leiarar for ættgreinene og hovdingar over ættene, dei som stod over alle som var mønstra.

³Dei førte offergåvene sine fram for Herren: seks vogner med tak og tolv oksar, ei vogn for to hovdingar og ein okse for kvar av dei. Alt dette kom dei fram til heilagdomen med.

⁴Herren sa til Moses:

⁵«Ta imot desse gåvene! Dei skal brukast til tenesta ved møteteltet. Gjev dei til levittane, etter som kvar treng det til arbeidet sitt.»

⁶Så tok Moses imot vognene og oksane og gav dei til levittane.

⁷Gersjon-sønene fekk to vogner og fire oksar til det arbeidet dei skulle ha.

⁸Merari-sønene fekk fire vogner og åtte oksar til det arbeidet dei skulle ha. Og Itamar, son til Aron, presten, hadde tilsyn med dei.

⁹Kehat-sønene fekk ikkje noko; for dei skulle ta vare på dei heilage tinga og bera dei på akslene.

¹⁰Den dagen altaret vart salva, kom hovdingane med offergåver til vigslinga og bar dei fram til altaret.

¹¹Då sa Herren til Moses: «Lat hovdingane koma kvar sin dag med gåvene sine til altarvigsla!»

¹²Den som bar fram gåva si fyrste dagen, var Naksjon, son til Amminadab, frå Juda-ætta.

¹³Gåva hans var eit sølvfat som vog 130 sekel, og ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

¹⁴ei gullskål som vog 10 sekel og var full av røykjelse,

¹⁵ein ung okse, ein ver og eit årsgamalt lam til brennoffer,

¹⁶ein bukk til syndoffer

¹⁷og til måltidsoffer to oksar, fem verar, fem bukkar og fem årsgamle lam. Det var gåva frå Naksjon, son til Amminadab.

¹⁸Andre dagen kom Netanel, son til Suar, hovdingen over Jissakar.

¹⁹Den gåva han bar fram, var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

²⁰ei gullskål som vog 10 sekel og var full av røykjelse,

²¹ein ung okse, ein ver og eit årsgamalt lam til brennoffer,

²²ein bukk til syndoffer,

²³og til måltidsoffer to oksar, fem verar, fem bukkar og fem årsgamle lam. Det var gåva frå Netanel, son til Suar.

²⁴Tredje dagen kom hovdingen over Sebulons-sønene, Eliab, son til Helon.

²⁵Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

²⁶ei gullskål som vog 10 sekel og var full av røykjelse,

²⁷ein ung okse, ein ver og eit årsgamalt lam til brennoffer,

²⁸ein bukk til syndoffer,

²⁹og til måltidsoffer to oksar, fem verar, fem bukkar og fem årsgamle lam. Det var gåva frå Eliab, son til Helon.

³⁰Fjerde dagen kom hovdingen over Rubens-sønene, Elisur, son til Sjede’ur.

³¹Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

³²ei gullskål som vog 10 sekel og var full av røykjelse,

³³ein ung okse, ein ver og eit årsgamalt lam til brennoffer,

³⁴ein bukk til syndoffer,

³⁵og til måltidsoffer to oksar, fem verar, fem bukkar og fem årsgamle lam. Det var gåva frå Elisur, son til Sjede’ur.

³⁶Femte dagen kom hovdingen over Simeons-sønene, Sjelumiel, son til Surisjaddai.

³⁷Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

³⁸ei gullskål som vog 10 sekel og var full av røykjelse,

³⁹ein ung okse, ein ver og eit årsgamalt lam til brennoffer,

⁴⁰ein bukk til syndoffer,

⁴¹og til måltidsoffer to oksar, fem verar, fem bukkar og fem årsgamle lam. Det var gåva frå Sjelumiel, son til Surisjaddai.

⁴²Sjette dagen kom hovdingen over Gads-sønene, Eljasaf, son til De’uel.

⁴³Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁴⁴ei gullskål som vog 10 sekel og var full av røykjelse,

⁴⁵ein ung okse, ein ver og eit årsgamalt lam til brennoffer,

⁴⁶ein bukk til syndoffer,

⁴⁷og til måltidsoffer to oksar, fem verar, fem bukkar og fem årsgamle lam. Det var gåva frå Eljasaf, son til De’uel.

⁴⁸Sjuande dagen kom hovdingen over Efraims-sønene, Elisjama, son til Ammihud.

⁴⁹Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁵⁰ei gullskål som vog 10 sekel og var full av røykjelse,

⁵¹ein ung okse, ein ver og eit årsgamalt lam til brennoffer,

⁵²ein bukk til syndoffer,

⁵³og til måltidsoffer to oksar, fem verar, fem bukkar og fem årsgamle lam. Det var gåva frå Elisjama, son til Ammihud.

⁵⁴Åttande dagen kom hovdingen over Manasse-sønene, Gamliel, son til Pedasur.

⁵⁵Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁵⁶ei gullskål som vog 10 sekel og var full av røykjelse,

⁵⁷ein ung okse, ein ver og eit årsgamalt lam til brennoffer,

⁵⁸ein bukk til syndoffer,

⁵⁹og til måltidsoffer to oksar, fem verar, fem bukkar og fem årsgamle lam. Det var gåva frå Gamliel, son til Pedasur.

⁶⁰Niande dagen kom hovdingen over Benjamins-sønene, Abidan, son til Gidoni.

⁶¹Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁶²ei gullskål som vog 10 sekel og var full av røykjelse,

⁶³ein ung okse, ein ver og eit årsgamalt lam til brennoffer,

⁶⁴ein bukk til syndoffer,

⁶⁵og til måltidsoffer to oksar, fem verar, fem bukkar og fem årsgamle lam. Det var gåva frå Abidan, son til Gidoni.

⁶⁶Tiande dagen kom hovdingen over Dans-sønene, Akieser, son til Ammisjaddai.

⁶⁷Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁶⁸ei gullskål som vog 10 sekel og var full av røykjelse,

⁶⁹ein ung okse, ein ver og eit årsgamalt lam til brennoffer,

⁷⁰ein bukk til syndoffer,

⁷¹og til måltidsoffer to oksar, fem verar, fem bukkar og fem årsgamle lam. Det var gåva frå Akieser, son til Ammisjaddai.

⁷²Ellevte dagen kom hovdingen over Asjers-sønene, Pagiel, son til Okran.

⁷³Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁷⁴ei gullskål som vog 10 sekel og var full av røykjelse,

⁷⁵ein ung okse, ein ver og eit årsgamalt lam til brennoffer,

⁷⁶ein bukk til syndoffer,

⁷⁷og til måltidsoffer to oksar, fem verar, fem bukkar og fem årsgamle lam. Det var gåva frå Pagiel, son til Okran.

⁷⁸Tolvte dagen kom hovdingen over Naftali-sønene, Akira, son til Enan.

⁷⁹Gåva hans var eit sølvfat som vog 130 sekel, ei sølvskål som vog 70 sekel etter den vekt dei nyttar i heilagdomen, begge fulle av kveitemjøl, blanda med olje, til grødeoffer,

⁸⁰ei gullskål som vog 10 sekel og var full av røykjelse,

⁸¹ein ung okse, ein ver og eit årsgamalt lam til brennoffer,

⁸²ein bukk til syndoffer,

⁸³og til måltidsoffer to oksar, fem verar, fem bukkar og fem årsgamle lam. Det var gåva frå Akira, son til Enan.

⁸⁴Dette var gåvene frå Israels-hovdingane då altaret vart salva og vigsla: tolv sølvfat, tolv sølvskåler og tolv gullskåler.

⁸⁵Kvart sølvfat vog 130 sekel og kvar sølvskål 70 sekel. Alt sølvet i kara vog til saman 2 400 sekel etter den vekt dei nyttar i heilagdomen.

⁸⁶Dei tolv gullskålene, som var fulle av røykjelse, vog 10 sekel kvar etter den vekt dei nyttar i heilagdomen. Til saman vog gullet i skålene 120 sekel.

⁸⁷Til brennoffer gav dei i alt tolv oksar, tolv verar og tolv årsgamle lam med dei grødeoffer som tilhøyrde, og tolv bukkar til syndoffer.

⁸⁸Til måltidsoffer gav dei 24 oksar, 60 verar, 60 bukkar og 60 årsgamle lam. Det var gåvene som vart framborne då altaret var salva og vigsla.

⁸⁹Når Moses gjekk inn i møteteltet og skulle tala med Herren, då høyrde han røysta tala til han frå soningsstaden over lovkista, frå romet mellom dei to kjerubane. Der tala Herren til han.