Read nynorsk 1978 4. Mosebok 8 Bible Online

4. Mosebok 8 - nynorsk 1978 bible

4. Mosebok 8

¹Herren sa til Moses:

²«Tal til Aron og sei: Når du set opp lampene, skal du laga det så at alle sju kastar ljoset beint fram for ljosestaken.»

³Og Aron gjorde så. Han sette opp lampene såleis at dei kasta ljoset beint fram for staken, som Herren hadde sagt Moses føre.

⁴Ljosestaken var laga av hamra gull, heilt frå foten opp til krona. Moses hadde laga staken etter det førebiletet Herren hadde vist han.

⁵Herren sa til Moses:

⁶Du skal ta ut levittane mellom israelittane og reinsa dei.

⁷Såleis skal du fara åt når du reinsar dei: Du skal skvetta reinsingsvatn på dei. Så skal dei raka seg over heile kroppen og vaska kleda sine. Såleis skal dei reinsa seg.

⁸Ta så ein ung okse og grødeofferet som høyrer til, kveitemjøl, blanda med olje. Til syndoffer skal du ta ein annan ung okse.

⁹Så skal du la levittane koma fram til møteteltet, og der skal du samla heile Israels-lyden.

¹⁰Før levittane fram for Herren, og lat israelittane leggja hendene på dei! [5]

¹¹Aron skal via levittane for Herrens åsyn til eit offer frå folket, og så kan dei gjera teneste for Herren.

¹²Levittane skal leggja hendene på hovudet åt oksane. Den eine skal du ofra som syndoffer og den andre som brennoffer til Herren, og såleis skal du gjera soning for levittane.

¹³Du skal føra levittane fram for Aron og sønene hans og via dei, så dei vert eit offer til Herren.

¹⁴Såleis skal du skilja levittane ut frå dei andre israelittane, og dei skal høyra meg til.

¹⁵Sidan skal dei koma og gjera teneste ved møteteltet, etter at du har reinsa og vigt dei.

¹⁶For mellom israelittane er det dei som er heilt overlatne til meg. Eg har gjort dei til min eigedom i staden for alle dei fyrstefødde hjå israelittane, alle som kjem fyrst frå mors liv.

¹⁷For alt fyrstefødt i Israel, både av folk og fe, høyrer meg til. Den dagen eg slo i hel alle dei fyrstefødde i Egypt, då vigsla eg dei til min eigedom.

¹⁸Men no har eg teke levittane i staden for alle dei fyrstefødde i Israel.

¹⁹Eg tok dei ut mellom israelittane og gav dei til Aron og sønene hans. Dei skal tena israelittane i møteteltet og gjera soning for dei, så det ikkje skal koma ulukke over israelittane når dei kjem heilagdomen for nær.

²⁰Moses og Aron og heile Israelslyden gjorde alt dette med levittane. Dei gjorde i alle måtar så som Herren hadde sagt Moses føre.

²¹Levittane reinsa seg og vaska kleda sine. Aron vigde dei til eit offer åt Herren og gjorde soning for dei, så dei vart reine.

²²Sidan kom levittane og gjorde teneste ved møteteltet, og Aron og sønene hans hadde tilsyn med dei. Som Herren hadde sagt Moses føre, så gjorde dei med levittane.

²³Herren sa til Moses:

²⁴Dette er lova som gjeld for levittane: Frå dei er tjuefem år gamle, skal dei koma og gjera teneste og arbeida ved møteteltet.

²⁵Men når dei har fylt femti år, skal dei dra seg ut or tenesta og ikkje arbeida lenger.

²⁶Dei kan hjelpa brørne sine med arbeidet ved møteteltet, men ikkje ha fast teneste. Såleis skal du ordna arbeidet åt levittane.