Read nynorsk 1978 Haggai 2 Bible Online

Haggai 2 - nynorsk 1978 bible

Haggai 2

¹Den 21. dagen i den sjuande månaden kom Herrens ord ved profeten Haggai, og det lydde så: [3]

²Sei til Serubabel Sjealtielsson, statthaldaren i Juda, og til Josva Jehosadaksson, øvstepresten, og til dei som er att av folket:

³Er det enno nokon att av dykk som har sett kor herleg dette huset var før? Og kva tykkjer de om det no? Ser det ikkje smått ut?

⁴Men no, ver frimodig og sterk, ¬Serubabel! lyder ordet frå Herren. Ver frimodig, ¬Josva Jehosadaksson, du øvsteprest! Ver frimodig, ¬alt folket i landet! lyder ordet frå Herren. Gå og arbeid, ¬for eg er med dykk! lyder ordet frå Herren, ¬Allhærs Gud.

⁵Den lovnaden gav eg dykk då de drog ut or Egypt. Og min Ande ¬bur imellom dykk. Ver ikkje redde!

⁶For så seier Herren, ¬Allhærs Gud: Endå ein gong, ¬om ei lita stund, vil eg skaka himmel og jord, havet og det turre land.

⁷Eg skjek alle folkeslag, så skattane deira kjem hit. Og eg fyller dette huset ¬med herlegdom, seier Herren, Allhærs Gud.

⁸Sølvet er mitt, og gullet er mitt, lyder ordet frå Herren, ¬Allhærs Gud.

⁹Dette nye huset skal verta herlegare enn det førre, seier Herren, Allhærs Gud. På denne staden vil eg gje fred, lyder ordet frå Herren, ¬Allhærs Gud.

¹⁰Den 24. dagen i den niande månaden i det andre styringsåret åt Dareios kom Herrens ord til profeten Haggai, og det lydde så:

¹¹Så seier Herren, Allhærs Gud: Spør kva prestane lærer om dette:

¹²«Om nokon ber heilagt kjøt i kappesnippen, og snippen kjem borti brød eller kokt mat eller vin eller olje eller anna etande, vert då dette heilagt?» Prestane svara nei.

¹³Så spurde Haggai: «Men om ein har vorte urein av lik og så kjem nær noko av dette, vert det då ureint?» Prestane svara: «Ja, det vert ureint.»

¹⁴Då tok Haggai til ords og sa: Såleis er det òg med desse menneska og dette folket i mine augo, lyder ordet frå Herren; og såleis er det med alt det dei gjer, og med det dei ofrar der; det er ureint.

¹⁵Men no, legg merke til det som hender frå denne dagen og frametter! Før de la stein på stein i Herrens tempel,

¹⁶korleis gjekk det dykk då? Kom nokon til ein kornhaug der det skulle vera tjue mål, fann han berre ti; kom nokon til ein pressekum og ville ausa opp femti spann, vart det berre tjue.

¹⁷Eg slo dykk med kornbrann og rust, med hagl over alt dykkar arbeid. Men ingen av dykk kom til meg, lyder ordet frå Herren. [4]

¹⁸Legg merke til det som hender frå denne dagen og frametter, frå den 24. dagen i den niande månaden, frå den dagen då grunnsteinen til Herrens tempel vart lagd! Legg merke til

¹⁹om såkornet framleis er i kornkummen, og om vintreet og fikentreet, granatapalen og oliventreet framleis er utan frukt. Frå i dag vil eg velsigna. [5]

²⁰Andre gongen kom Herrens ord til Haggai den 24. dagen i same månaden, og det lydde så:

²¹Sei til Serubabel, statthaldaren i Juda: Eg vil skaka himmel og jord.

²²Eg vil støyta ned kongsstolar og gjera ende ¬på mektige kongerike mellom folkeslaga. Eg vil øydeleggja ¬stridsvognene og dei som køyrer dei. Hestar og hestfolk skal stupa; den eine skal falla ¬for sverdet åt den andre.

²³Den dagen, lyder ordet frå Herren, Allhærs Gud, vil eg ta deg, Serubabel Sjealtielsson, min tenar — lyder ordet frå Herren — og gjera deg til ein seglring; for deg har eg valt ut, lyder ordet frå Herren, Allhærs Gud. [6]