Read nynorsk 1978 Matteus 1 Bible Online

Matteus 1 - nynorsk 1978 bible

Matteus 1

¹Dette er ættetavla åt Jesus Kristus, Davids son og Abrahams son:

²Abraham fekk sonen Isak, Isak fekk Jakob, Jakob vart far til Juda og brørne hans.

³Juda fekk sønene Peres og Serah med Tamar. Peres fekk sonen Hesron, Hesron fekk Aram,

⁴Aram fekk Amminadab, Amminadab fekk Naksjon, Naksjon fekk Salma;

⁵Salma fekk sonen Boas med Rahab, Boas fekk sonen Obed med Rut, Obed fekk Isai,

⁶og Isai var far til kong David. David fekk sonen Salomo med kona til Uria,

⁷Salomo fekk sonen Rehabeam, Rehabeam fekk Abia, Abia fekk Asa,

⁸Asa fekk Josjafat, Josjafat fekk Joram, Joram fekk Ussia,

⁹Ussia fekk Jotam, Jotam fekk Akas, Akas fekk Hiskia,

¹⁰Hiskia fekk Manasse, Manasse fekk Amon, Amon fekk Josjia,

¹¹og Josjia vart far til Jojakin og brørne hans; det var på den tid då folket vart bortført til Babylon.

¹²Etter at dei vart førte til Babylon, fekk Jojakin sonen Sjealtiel, Sjealtiel fekk Serubabel,

¹³Serubabel fekk Abiud, Abiud fekk Eljakim, Eljakim fekk Asor,

¹⁴Asor fekk Sadok, Sadok fekk Akim, Akim fekk Eliud,

¹⁵Eliud fekk Elasar, Elasar fekk Mattan, Mattan fekk Jakob,

¹⁶og Jakob var far til Josef, mannen til Maria. Ho fødde Jesus, han som vert kalla Kristus.

¹⁷Såleis er det i alt fjorten ættleder frå Abraham til David, fjorten ættleder frå David til Babylon-ferda, og fjorten ættleder frå Babylon-ferda fram til Kristus.

¹⁸Då Jesus Kristus vart fødd, gjekk det såleis til: Mor hans, Maria, var trulova med Josef; men før dei kom saman, synte det seg at ho var med barn, ved Den Heilage Ande. [1]

¹⁹Josef, festarmannen hennar, var ein rett-tenkt mann og ville ikkje føra skam over henne; han sette seg føre å skiljast frå henne så stilt han kunne.

²⁰Medan han no tenkte på dette, synte ein engel frå Herren seg for han i ein draum og sa: «Josef, Davids son! Ver ikkje redd å ta Maria heim til deg som kona di. For barnet som er avla i henne, er av Den Heilage Ande.

²¹Ho skal få ein son, og du skal kalla han Jesus, for han skal frelsa folket sitt frå syndene deira.» [2]

²²Alt dette hende så det skulle oppfyllast, det Herren har tala gjennom profeten:

²³Sjå, møya skal verta med barn ¬og føda ein son, og han skal kallast Immanuel — det tyder: Gud med oss.

²⁴Då Josef vakna or svevnen, gjorde han som Herrens engel hadde sagt til han, og tok brura si heim til seg.

²⁵Men han levde ikkje saman med henne før ho hadde fått sonen sin; honom kalla han Jesus.