Read nynorsk 1978 Matteus 11 Bible Online

Matteus 11 - nynorsk 1978 bible

Matteus 11

¹Då Jesus hadde sagt det han ville leggja dei tolv læresveinane sine på hjarta, fór han derifrå og tok til å læra og forkynna kring i byane.

²Johannes, som sat i fengsel, fekk høyra om alt det Kristus gjorde. Han sende bod med læresveinane sine og spurde:

³«Er du den som skal koma, eller skal vi venta ein annan?»

⁴Jesus svara: «Gå og fortel Johannes kva de høyrer og ser:

⁵Blinde ser og lame går, spedalske vert reine og døve høyrer, døde står opp, og evangeliet vert forkynt for fattige;

⁶og sæl er den som ikkje støyter seg på meg!»

⁷Då dei var farne, tok Jesus til å tala til folket om Johannes: «Kvifor gjekk de ut i øydemarka? Ville de sjå eit sevstrå som svagar i vinden?

⁸Nei! Kvifor gjekk de dit ut? Ville de sjå ein mann med fine klede? Dei som går i fine klede, held til i kongsgardane.

⁹Men kvifor gjekk de dit ut? Ville de sjå ein profet? Ja, eg seier dykk: Meir enn ein profet!

¹⁰Det er om han dette er skrive: Sjå, eg sender min bodberar ¬føre deg, han skal rydja vegen for deg.

¹¹Sanneleg, det seier eg dykk: Aldri har det stått fram nokon større mellom dei som er fødde av kvinner, enn døyparen Johannes. Men jamvel den minste i himmelriket er større enn han.

¹²Frå Johannes døyparens dagar og til no vert himmelriket storma, og dei som stormar det, riv det til seg.

¹³For alle profetane og lova har profetert heilt til Johannes kom.

¹⁴Og vil de tru det: Han er den Elia som skulle koma. [24]

¹⁵Den som har øyro, han høyre!

¹⁶Men kva skal eg likna denne ætta med? Ho er lik born som sit på torget og ropar til kvarandre:

¹⁷Vi bles på fløyte for dykk, men de ville ikkje dansa. Vi song syrgjesongar, men de ville ikkje klaga.

¹⁸For Johannes kom; han korkje åt eller drakk, og folk seier: Han er forgjord.

¹⁹Menneskesonen kom; han både et og drikk, og dei seier: Sjå, for ein storetar og vindrikkar, og ven med tollarar og syndarar! Men Visdomen har fått rett, det syner gjerningane hans.» [25]

²⁰Så tok Jesus til å refsa dei byane der han hadde gjort dei fleste av sine mektige gjerningar, fordi folket ikkje hadde vendt om:

²¹«Ve deg, Korasin! Ve deg, Betsaida! Hadde dei mektige gjerningane som er gjorde hjå dykk, vore gjorde i Tyrus og Sidon, hadde dei for lenge sidan vendt om og kledt seg i sekk og oske. [26]

²²Men det seier eg dykk: På domedag skal Tyrus og Sidon sleppa lettare enn de.

²³Og du, Kapernaum, du som vil opphøgjast like til himmelen, til dødsriket skal du støytast ned! Hadde dei mektige gjerningane som er gjorde hjå deg, vore gjorde i Sodoma, hadde byen stått til denne dag.

²⁴Men det seier eg dykk: På domedag skal det gå Sodoma-landet likare enn deg.»

²⁵På den tid tok Jesus til ords og sa: «Eg lovar deg, Far, Herre over himmel og jord, fordi du har løynt dette for vise og vituge, men openberra det for umyndige.

²⁶Ja, Far, for dette var din gode vilje.

²⁷Alt har Far min overgjeve til meg. Ingen kjenner Sonen utan Faderen, og ingen kjenner Faderen utan Sonen og den som Sonen vil openberra det for.

²⁸Kom til meg, alle de som slit og har tungt å bera; eg vil gje dykk kvile!

²⁹Ta mitt åk på dykk og lær av meg, for eg er mild og mjuk i hjarta; så skal de finna kvile for sjelene dykkar.

³⁰For mitt åk er godt, og mi bør er lett.»