Read nynorsk 1978 Matteus 14 Bible Online

Matteus 14 - nynorsk 1978 bible

Matteus 14

¹På den tid fekk fylkeskongen Herodes høyra gjetordet om Jesus. [28]

²Då sa han til mennene sine: «Det er døyparen Johannes. Han har stått opp frå dei døde; difor er desse kreftene verksame i han.»

³Herodes hadde teke Johannes og bunde han og kasta han i fengsel. Dette var Herodias skuld i; ho var kona til Filip, bror hans.

⁴For Johannes hadde sagt til Herodes: «Du har ikkje lov å ha henne til kone.»

⁵Herodes ville helst ha drepe han, men han var redd folket; for dei meinte at Johannes var ein profet.

⁶Men då Herodes høgtida årmålsdagen sin, dansa dotter til Herodias for gjestene. Herodes tykte så vel om dette

⁷at han med eid lova å gje henne kva ho så bad om.

⁸Då fekk mora henne til å seia: «Gjev meg hovudet åt døyparen Johannes på eit fat.»

⁹Kongen vart ille ved; men fordi han hadde svore, og det medan gjestene høyrde på, baud han at ho skulle få det,

¹⁰og han sende folk som skulle halshogga Johannes i fengslet.

¹¹Så kom dei med hovudet hans på eit fat og gav det til jenta, og ho gjekk til mor si med det.

¹²Men læresveinane hans kom og henta liket og gravla det; sidan gjekk dei til Jesus og fortalde det som hadde hendt.

¹³Då Jesus fekk høyra det, gjekk han ut i ein båt og drog derifrå til ein øydestad, så han kunne vera åleine. Men folk fekk spurt det, og dei kom etter han til fots frå byane.

¹⁴Som han steig i land, fekk han sjå ein stor folkehop. Han tykte hjarteleg synd i dei og lækte dei som var sjuke.

¹⁵Då det leid til kvelds, kom læresveinane til han og sa: «Det er audt her, og dagen lid. Send folket frå deg, så dei kan gå bort i landsbyane og kjøpa seg mat.»

¹⁶«Dei treng ikkje gå herifrå,» sa Jesus, «gjev de dei mat!»

¹⁷«Vi har ikkje meir enn fem brød og to fiskar,» svara dei.

¹⁸Då sa Jesus: «Kom hit til meg med det!»

¹⁹Så baud han folket setja seg i graset. Og han tok dei fem brøda og dei to fiskane, såg opp mot himmelen og bad takkebøna. Så braut han brødet og gav det til læresveinane, og læresveinane gav det til folket. [29]

²⁰Og alle åt og vart mette. Etterpå samla dei opp dei stykka som var att, og det vart tolv fulle korger.

²¹Dei som hadde ete, var ikring fem tusen menn forutan kvinner og born.

²²Straks etter fekk Jesus læresveinane til å gå i båten og fara føre over til hi sida, medan han bad farvel med folket.

²³Då han hadde gjort det, gjekk han opp i fjellet så han kunne vera for seg sjølv og be. Då kvelden kom, var han der åleine.

²⁴Båten var alt langt frå land og stridde hardt i bylgjene, for vinden var imot.

²⁵Men i den fjerde nattevakta kom han gåande mot dei på sjøen.

²⁶Og då læresveinane såg han gå på vatnet, vart dei forfærde. «Det er eit skrømt!» sa dei, og var så redde at dei skreik.

²⁷Men i det same tala Jesus til dei: «Ver frimodige, det er eg. Ver ikkje redde!»

²⁸Då sa Peter til han: «Herre, er det du, så sei at eg skal koma til deg på vatnet.»

²⁹«Kom!» sa Jesus. Peter steig ut or båten og gjekk på vatnet, bort til Jesus.

³⁰Men då han såg kor hardt det bles, vart han redd og tok til å søkka. «Herre, frels meg!» ropa han.

³¹Med det same rette Jesus ut handa og greip han og sa: «Kor lite tru du har! Kvifor tvila du?»

³²Så steig dei opp i båten, og vinden la seg.

³³Men dei som var i båten, fall på kne for han og sa: «Du er sanneleg Guds Son!»

³⁴Då dei kom over, la dei til lands i Gennesaret.

³⁵Folket der på staden kjende han att og sende bod kringom i heile grannelaget, og dei kom til han med alle som var sjuke.

³⁶Dei bad om at dei berre måtte få ta i kanten på kappa hans, og alle som gjorde det, vart friske.