Read nynorsk 1978 Matteus 16 Bible Online

Matteus 16 - nynorsk 1978 bible

Matteus 16

¹Då kom farisearane og saddukearane og bad han visa dei eit teikn frå himmelen; dei ville setja han på prøve.

²Men han svara: «Om kvelden seier de: Det vert godt ver, for himmelen er raud,

³og om morgonen: I dag vert det uver, for himmelen er raud og mørk. Det de ser på himmelen, veit de å tyda, men tidarteikna kan de ikkje tyda.

⁴Ei vond og utru ætt krev teikn, men ho skal ikkje få anna teikn enn Jona-teiknet.» Dermed snudde han seg frå dei og drog bort.

⁵Då dei fór over til den andre sida, gløymde læresveinane å ta brød med seg.

⁶Jesus sa til dei: «Ta dykk i vare og akta dykk for surdeigen til farisearane og saddukearane.»

⁷Dei tenkte på dette og sa til kvarandre: «Det er fordi vi ikkje har teke brød med oss.»

⁸Men Jesus merka det og sa: «Kor lite tru de har! Kvifor talar de om at de ikkje har brød?

⁹Skjønar de enno ingen ting? Hugsar de ikkje dei fem brøda til dei fem tusen, og kor mange korger de då fekk att?

¹⁰Eller dei sju brøda til dei fire tusen, og kor mange korger de då fekk att?

¹¹Korleis kan de tenkja at det var brød eg tala om? Men ta dykk i vare for surdeigen til farisearane og saddukearane.»

¹²Då skjøna dei at det ikkje var surdeig i brød dei skulle akta seg for, men læra til farisearane og saddukearane.

¹³Då Jesus kom til bygdene ved Cæsarea Filippi, spurde han læresveinane sine: «Kven seier folk at Menneskesonen er?»

¹⁴Dei svara: «Somme seier døyparen Johannes, andre Elia, og atter andre Jeremia eller ein annan av profetane.»

¹⁵«Og de,» spurde han, «kven seier de at eg er?»

¹⁶Då svara Simon Peter: «Du er Messias, den levande Guds Son.»

¹⁷Jesus tok til ords og sa: «Sæl er du, Simon, Jonason. For dette har ikkje kjøt og blod openberra for deg, men Far min i himmelen.

¹⁸Og det seier eg deg: Du er Peter, og på dette berget vil eg byggja mi kyrkje, og dødsrikeportane skal ikkje få makt over henne. [33]

¹⁹Eg vil gje deg nyklane til himmelriket; det du bind på jorda, skal vera bunde i himmelen, og det du løyser på jorda, skal vera løyst i himmelen.» [34]

²⁰Så forbaud han læresveinane strengt å seia det til nokon at han var Messias.

²¹Frå den tid tok Jesus Kristus til å gjera det klårt for læresveinane at han laut fara til Jerusalem, og at dei eldste, overprestane og dei skriftlærde skulle la han lida mykje. Han skulle verta slegen i hel, og tredje dagen skulle han stå opp att.

²²Då tok Peter han til sides og gav seg til å tala han til rettes og sa: «Gud hjelpe deg, Herre! Dette må aldri henda deg.»

²³Men Jesus snudde seg og sa til Peter: «Vik bak meg, Satan! Du vil føra meg til fall. Du har ikkje sans for det som Gud vil, berre for det som menneske vil.»

²⁴Same gongen sa Jesus til læresveinane: «Vil nokon vera i lag med meg, må han seia nei til seg sjølv og ta krossen sin opp og fylgja meg.

²⁵For den som vil berga livet sitt, skal missa det. Men den som misser livet sitt for mi skuld, han skal finna det.

²⁶Kva gagnar det eit menneske om det vinn heile verda, men taper si sjel? Eller kva kan eit menneske gje til vederlag for si sjel?

²⁷For Menneskesonen skal koma i herlegdomen åt Far sin med englane sine, og då skal han gje kvar og ein lika for det han har gjort.

²⁸Sanneleg, det seier eg dykk: Somme av dei som står her, skal ikkje smaka døden før dei ser Menneskesonen koma i sitt rike.»