Read nynorsk 1978 Matteus 2 Bible Online

Matteus 2 - nynorsk 1978 bible

Matteus 2

¹Det var i Betlehem i Judea Jesus vart fødd, medan Herodes var konge. Då kom det nokre vismenn frå Austerland til Jerusalem [3]

²og spurde: «Kvar er den jødekongen som nett er fødd? Vi såg stjerna hans då ho synte seg i dagsranda, og no er vi komne og vil hylla han.» [4]

³Då kong Herodes fekk høyra det, vart han svært uroleg, og heile Jerusalem med han.

⁴Han kalla saman alle overprestane og dei skriftlærde i folket, og spurde dei kvar Messias skulle verta fødd.

⁵«I Betlehem i Judea,» svara dei, «for så står det skrive hjå profeten:

⁶Du Betlehem i Juda land er så visst ikkje den ringaste ¬av fyrstane i Juda. Frå deg skal det koma ¬ein hovding, som skal vera hyrding for Israel, ¬folket mitt.»

⁷Då kalla Herodes vismennene til seg i løynd og spurde dei nøye ut om tida då stjerna hadde synt seg

⁸Så sende han dei til Betlehem og sa: «Gå og spør dykk føre om dette barnet. Og når de har funne det, så sei frå til meg, så eg òg kan koma og hylla det.»

⁹Då dei hadde høyrt på kongen, tok dei i veg. Og sjå, stjerna som dei hadde sett koma opp, fór føre dei heilt til ho vart ståande over staden der barnet var.

¹⁰Då dei såg stjerna, vart dei overlag glade.

¹¹Dei gjekk inn i huset og fann barnet hjå mora, Maria. Og dei fall på kne og hylla det. Så opna dei skrina sine og bar fram gåver til barnet: gull, røykjelse og myrra. [5]

¹²Men Gud varsla dei i ein draum at dei ikkje måtte fara attende til Herodes, og dei tok ein annan veg heim att til landet sitt.

¹³Då dei var farne, synte Herrens engel seg for Josef i ein draum og sa: «Stå opp, ta barnet og mora med deg og røm til Egypt, og ver der til eg seier frå! For Herodes kjem til å leita etter barnet og vil drepa det.»

¹⁴Han stod opp, og same natta tok han barnet og mora og fór til Egypt,

¹⁵og der vart han verande til Herodes døydde. Såleis skulle det oppfyllast, det ordet Herren har tala gjennom profeten: Frå Egypt kalla eg son min.

¹⁶Då Herodes skjøna at vismennene hadde narra han, vart han brennande harm. Han sende ut folk og lét dei drepa alle guteborn i Betlehem og grannelaget, dei som var to år eller yngre; dette var i samsvar med det han hadde fått vita av vismennene om tida.

¹⁷Då vart det oppfylt, det ordet som profeten Jeremia har tala:

¹⁸Det høyrdest eit rop ¬i Rama, gråt og høg klage; Rakel gret over borna sine og ansa ikkje trøystarord. For borte er dei.

¹⁹Etter at Herodes var død, synte Herrens engel seg i ein draum for Josef i Egypt

²⁰og sa: «Stå opp, ta barnet og mora og far til Israels-landet! For no er dei borte, dei som ville ta livet av barnet.»

²¹Då stod han opp, tok barnet og mora og fór til Israels-landet.

²²Men då han fekk høyra at Arkelaus hadde vorte konge i Judea etter Herodes, far sin, torde han ikkje fara dit. Han vart varsla i ein draum og drog til Galilea. [6]

²³Då han kom dit, busette han seg i ein by som heiter Nasaret. Såleis skulle det oppfyllast, det profetane hadde sagt, at han skulle kallast nasarear. [7]