Read nynorsk 1978 Matteus 20 Bible Online

Matteus 20 - nynorsk 1978 bible

Matteus 20

¹Himmelriket kan liknast med ein husbond som gjekk ut tidleg om morgonen og ville leiga arbeidsfolk til vingarden sin.

²Han vart samd med arbeidarane om ein denar for dagen og sende dei bort i vingarden.

³Så gjekk han ut ikring den tredje timen og fekk sjå nokre andre som stod ledige på torget.

⁴Han sa til dei: Gå bort i vingarden, de òg! Så skal de få det som rett er.

⁵Og dei gjekk. Sidan gjekk han ut ikring den sjette og niande timen og gjorde like eins.

⁶Då det leid til den ellevte timen, gjekk han ut att og fann endå nokre som stod der. Han seier til dei: Kvifor står de her arbeidslause heile dagen?

⁷Fordi ingen har leigt oss, svara dei. Då sa han: Gå bort i vingarden, de òg.

⁸Om kvelden sa vingardseigaren til hushaldaren sin: Rop inn arbeidsfolket og lat dei få løna si! Ta til med dei siste og hald fram til dei fyrste.

⁹Så kom dei som var leigde ikring den ellevte timen, og fekk ein denar kvar.

¹⁰Då dei fyrste kom, venta dei å få meir; men dei fekk kvar sin denar, dei òg.

¹¹Dei tok imot pengane, men murra mot husbonden

¹²og sa: Dei som kom sist, har ikkje arbeidt meir enn ein time, og så set du dei likt med oss som har slite og sveitta heile dagen!

¹³Han sa til ein av dei: Eg gjer deg ikkje urett, venen min. Var vi ikkje samde om ein denar?

¹⁴Ta ditt og gå! Men eg vil gje han som kom sist, like mykje som deg.

¹⁵Har eg ikkje lov å gjera med mitt som eg vil? Eller gjer det deg vondt å sjå at eg er god?

¹⁶Såleis skal dei siste verta dei fyrste og dei fyrste dei siste.»

¹⁷Jesus drog no opp til Jerusalem. På vegen tok han dei tolv læresveinane til sides og sa:

¹⁸«Sjå, vi dreg opp til Jerusalem, og Menneskesonen skal gjevast i hendene på overprestane og dei skriftlærde. Dei skal døma han til døden

¹⁹og gje han over til heidningane, så han vert spotta, piska og krossfest. Og tredje dagen skal han stå opp att.»

²⁰Då kom mor åt Sebedeus-sønene til Jesus med sønene sine og fall på kne og ville be han om noko.

²¹«Kva er det du vil?» spurde han. Ho svara: «Lov meg at desse to sønene mine skal få sitja attmed deg i riket ditt, den eine på høgre og den andre på venstre sida.»

²²«De veit ikkje kva de bed om,» sa Jesus. «Kan de drikka den skåla som eg skal drikka?» «Det kan vi,» svara dei.

²³Då sa han: «Mi skål skal de nok drikka; men kven som skal sitja på mi høgre og venstre side, er det ikkje mi sak å avgjera. Der skal dei sitja som Far min har etla det åt.»

²⁴Då dei ti andre høyrde dette, vart dei arge på dei to brørne.

²⁵Men Jesus kalla dei til seg og sa: «De veit at fyrstane er herrar over folka, og stormennene har velde over dei.

²⁶Såleis er det ikkje hjå dykk. Den som vil vera stor mellom dykk, skal tena dei andre;

²⁷og den som vil vera den fremste av dykk, skal vera træl for dei andre.

²⁸Menneskesonen er heller ikkje komen for å tenast, men for å tena og gje livet sitt til løysepeng for mange.»

²⁹Då dei tok ut frå Jeriko, fylgde det mykje folk med han.

³⁰Attmed vegen sat det to blinde, og då dei høyrde at Jesus gjekk framom, ropa dei: «Herre, du Davids son, miskunna deg over oss!»

³¹Folket skjente på dei og bad dei teia, men dei ropa endå høgare: «Herre, du Davids son, miskunna deg over oss!»

³²Då stogga Jesus, bad dei koma og sa: «Kva vil de at eg skal gjera for dykk?»

³³«Herre, lat oss få synet!» svara dei.

³⁴Jesus tykte hjarteleg synd i dei og tok bortpå augo deira. Med ein gong kunne dei sjå, og dei fylgde han.