Read nynorsk 1978 Matteus 24 Bible Online

Matteus 24 - nynorsk 1978 bible

Matteus 24

¹Så gjekk Jesus bort frå templet. Då han var på veg ut, kom læresveinane til han og peika på tempelbygningane.

²Men han sa: «Sjå alt dette! Sanneleg, det seier eg dykk: Her skal det ikkje liggja att stein på stein; alt skal rivast ned.»

³Sidan, då han sat på Oljeberget og læresveinane var åleine med han, spurde dei: «Sei oss: Når skal dette henda? Og kva er teiknet på di atterkome og verdsens ende?»

⁴Jesus tok til ords og sa: Ta dykk i vare, så ingen fører dykk vilt!

⁵For mange skal koma i mitt namn og seia: «Eg er Messias.» Og dei skal føra mange på villspor.

⁶De skal høyra om krig, og det skal gå rykte om krig. Sjå til at de ikkje lèt dykk skræma! For dette lyt henda; men enno er ikkje enden komen.

⁷Folk skal reisa seg mot folk og rike mot rike, og det skal vera hungersnaud og jordskjelv mange stader.

⁸Men alt dette er berre dei fyrste føderiene.

⁹Då skal dei forråda dykk, driva dykk ut i trengsle og slå dykk i hel. Ja, alle folk skal hata dykk for mitt namn skuld.

¹⁰Mange skal då falla frå, og dei skal svika kvarandre og hata kvarandre.

¹¹Mange falske profetar skal stiga fram og føra mange vilt.

¹²Og av di lovløysa har vorte så stor, skal kjærleiken kolna hjå dei fleste.

¹³Men den som held ut til enden, han skal verta frelst.

¹⁴Og evangeliet om riket skal forkynnast i heile verda til vitnemål for alle folkeslag, og då skal enden koma.

¹⁵Når de då ser at «den øydande styggedomen», som profeten Daniel har tala om, står på den heilage staden — skjøn det, den som les! — [53]

¹⁶då må dei som er i Judea, røma til fjells;

¹⁷den som er på taket, må ikkje gå ned og henta noko i huset; [54]

¹⁸og den som er ute på marka, må ikkje gå heim etter kappa si.

¹⁹Stakkars dei som ventar barn og dei som gjev bryst i dei dagane!

²⁰Men bed at de må sleppa å røma om vinteren eller på ein sabbat!

²¹For då skal det verta så store trengsler som det aldri har vore frå verda vart skapt og til no, og som det heller aldri meir skal verta.

²²Og vart ikkje den tida avkorta, kom ikkje noko menneske til å verta frelst. Men for dei utvalde skuld skal den tida gjerast kortare.

²³Om nokon då seier til dykk: «Sjå her er Messias», eller: «Der er han», så tru det ikkje!

²⁴For det skal stå fram falske messiasar og falske profetar og gjera store teikn og under, så jamvel dei utvalde kan førast vilt, om det er råd.

²⁵Kom i hug at eg har sagt dykk det føreåt!

²⁶Seier dei då til dykk: «Han er ute i øydemarka», så gå ikkje dit, eller: «Han er inne i huset», så tru det ikkje.

²⁷For liksom lynet går ut frå aust og lyser radt til vest, slik skal det vera når Menneskesonen kjem.

²⁸Der åtselet er, vil gribbane samlast.

²⁹Så snart denne trengselstida er over, skal sola mørkjast og månen missa sitt ljos. Stjernene skal falla ned frå himmelen og kreftene i himmelrømda skakast.

³⁰Då skal teiknet åt Menneskesonen syna seg på himmelen, og alle folk på jorda skal setja i med klagerop; og dei skal sjå Menneskesonen koma på himmelskyene med stor makt og herlegdom.

³¹Medan luren ljomar, skal han senda ut englane sine, og dei skal samla dei han har valt seg ut, frå heimsens fire hjørne, frå himmelbryn til himmelbryn.

³²Lær ei likning av fikentreet: Når det kjem sevje i greinene, og lauvet sprett, då veit de at sommaren er nær.

³³Like eins når de ser alt dette henda; då veit de at han er utfor døra.

³⁴Sanneleg, det seier eg dykk: Denne ætta skal ikkje forgå før alt dette hender.

³⁵Himmel og jord skal forgå, men mine ord skal aldri forgå.

³⁶Men den dagen og timen kjenner ingen, ikkje englane i himmelen og heller ikkje Sonen, berre Faderen.

³⁷Som det var i Noahs dagar, så skal det vera når Menneskesonen kjem.

³⁸Liksom dei i tida før storflaumen åt og drakk, gifte seg og vart bortgifte, heilt til den dagen då Noah gjekk inn i arka,

³⁹og ingen skjøna noko før flaumen kom og tok dei alle, så skal det òg vera når Menneskesonen kjem.

⁴⁰Då skal to menn vera ute på marka; den eine vert henta, den andre vert att.

⁴¹To kvinner skal mala saman på kverna; den eine vert henta, den andre vert att.

⁴²Så vak då! For de veit ikkje kva dag Herren dykkar kjem.

⁴³Men det skal de vita: Dersom husbonden visste kva tid på natta tjuven kom, så vakte han og lét han ikkje bryta seg inn i huset.

⁴⁴Ver difor budde, de òg! For Menneskesonen kjem i ein time de ikkje ventar det.

⁴⁵Kven er den trugne og kloke tenaren, som husbonden har sett over tenestfolket sitt, så han kan gje dei mat i rett tid?

⁴⁶Det er den tenaren som husbonden finn i arbeid med dette når han sjølv kjem attende. Sæl er han!

⁴⁷Sanneleg, det seier eg dykk: Husbonden skal setja han over alt det han eig.

⁴⁸Men er tenaren ein ring kar, tenkjer han: Herren min kjem ikkje på lenge enno.

⁴⁹Og så tek han til å slå dei andre tenarane og eta og drikka i lag med stordrikkarar.

⁵⁰Då skal herren hans koma ein dag han ikkje ventar og ein time han ikkje veit av,

⁵¹og hogga han ned. Han skal få same lagnad som hyklarane, der dei græt og skjer tenner.