Read nynorsk 1978 Matteus 28 Bible Online

Matteus 28 - nynorsk 1978 bible

Matteus 28

¹Då sabbaten var til ende, og det tok til å ljosna fyrste dagen i veka, kom Maria Magdalena og den andre Maria og ville sjå til grava.

²Då kom det brått eit kraftig jordskjelv; for ein Herrens engel steig ned frå himmelen, gjekk fram til grava og velte steinen ifrå og sette seg på han.

³Han var som lynet å sjå til, og kleda hans var kvite som snø.

⁴Vaktmennene skalv av redsle då dei såg han, og dei vart liggjande som døde.

⁵Men engelen tala til kvinnene og sa: «Ver ikkje redde! Eg veit at de leitar etter Jesus, han som vart krossfest.

⁶Han er ikkje her; han er oppstaden, som han sa. Kom og sjå staden der han låg!

⁷Skunda dykk av stad og sei til læresveinane hans: Han er oppstaden frå dei døde, og no går han føre dykk til Galilea; der skal de få sjå han. No har eg sagt dykk det.»

⁸Då skunda dei seg bort frå grava, redde, men jublande glade; og dei sprang av stad og ville fortelja det til læresveinane.

⁹Men best det var, kom Jesus imot dei og sa: «Ver helsa!» Då gjekk dei fram, tok om føtene hans og tilbad han.

¹⁰Og Jesus sa til dei: «Ver ikkje redde! Gå og sei til brørne mine at dei skal fara til Galilea. Der skal dei få sjå meg.»

¹¹Medan kvinnene var på vegen, kom nokre av vaktmennene inn til byen og fortalde overprestane alt det som hadde hendt.

¹²Overprestane og dei eldste kom då saman, og dei vart samde om kva dei skulle gjera. Dei gav soldatane mange pengar

¹³og sa: «Sei at læresveinane hans kom om natta og stal han medan de sov.

¹⁴Og skulle landshovdingen få høyra om det, skal vi tala med han, så de kan vera trygge.»

¹⁵Dei tok imot pengane og gjorde som dei var føresagde. Såleis kom det ordet ut mellom jødane, og det har halde seg til denne dag.

¹⁶Men dei elleve læresveinane drog til Galilea, til det fjellet der Jesus hadde sagt at han ville møta dei.

¹⁷Og då dei fekk sjå han, fall dei ned og tilbad han; men somme tvila.

¹⁸Då steig Jesus fram og tala til dei: «Eg har fått all makt i himmelen og på jorda.

¹⁹Gå difor ut og gjer alle folkeslag til læresveinar, med di de døyper dei til namnet åt Faderen og Sonen og Den Heilage Ande,

²⁰og lærer dei å halda alt det som eg har bode dykk. Og sjå, eg er med dykk alle dagar så lenge verda står.»