Read nynorsk 1978 Matteus 3 Bible Online

Matteus 3 - nynorsk 1978 bible

Matteus 3

¹På den tid steig døyparen Johannes fram i øydemarka i Judea og forkynte:

²«Vend om, for himmelriket er nær!»

³Det er om han profeten Jesaja talar når han seier: Ei røyst ropar i øydemarka: Ryd veg for Herren, gjer stigane hans rette!

⁴Johannes gjekk i ei kappe av kamelhår og hadde eit lerbelte om livet, og maten hans var grashopper og vill honning.

⁵Folk drog ut til han, frå Jerusalem og heile Judea og landet attmed Jordan.

⁶Og han døypte dei i Jordan-elva, medan dei sanna syndene sine.

⁷Men då han såg at mange farisearar og saddukearar kom og ville verta døypte, sa han til dei: «Ormeyngel! Kven har lært dykk korleis de skal sleppa unna den vreidedomen som skal koma?

⁸Så ber då frukt som svarar til omvendinga.

⁹Og tru ikkje at de kan seia: Vi har Abraham til far. For eg seier dykk: Gud kan reisa opp born for Abraham av desse steinane.

¹⁰Øksa ligg alt innmed rota på trea; kvart tre som ikkje ber god frukt, vert hogge ned og kasta på elden.

¹¹Eg døyper dykk med vatn til omvending. Men han som kjem etter meg, er sterkare enn eg. Eg er ikkje eingong verdig til å ta av han sandalane. Han skal døypa dykk med Heilag Ande og eld.

¹²Han har kasteskufla i handa og skal reinsa kornet på treskjevollen. Kveiten skal han samla i løa, men agnene skal han brenna opp med eld som aldri sloknar.» [8]

¹³Då kom Jesus frå Galilea til Jordan, til Johannes, og ville verta døypt av han.

¹⁴Men Johannes ville hindra han og sa: «Eg treng dåp av deg, og så kjem du til meg!»

¹⁵Jesus svara: «Lat det no skje! Dette må vi gjera for å oppfylla all rettferd.» Då gjorde Johannes som Jesus ville.

¹⁶Med det same Jesus var døypt, steig han opp or vatnet. Og sjå, himmelen opna seg, og han såg Guds Ande koma dalande ned over seg som ei due.

¹⁷Og det lydde ei røyst frå himmelen: «Dette er Son min, han som eg elskar, han som eg har hugnad i.»