Read nynorsk 1978 Matteus 4 Bible Online

Matteus 4 - nynorsk 1978 bible

Matteus 4

¹Sidan førte Anden Jesus ut i øydemarka, så djevelen skulle freista han.

²Han fasta i førti dagar og førti netter, og til slutt vart han svolten.

³Då kom freistaren til han og sa: «Er du Guds Son, så sei at desse steinane skal verta til brød!»

⁴Jesus svara: «Det står skrive: Mennesket lever ikkje berre av brød, men av kvart ord som kjem frå Guds munn.»

⁵Då tok djevelen han med seg til den heilage byen, sette han på det ytste hjørnet av tempelmuren

⁶og sa: «Er du Guds Son, så kast deg utføre! For det står skrive: Han skal gje englane sine ¬påbod om deg, og dei skal bera deg ¬på hendene, så du ikkje støyter foten ¬på nokon stein.»

⁷Men Jesus svara: «Det står òg skrive: Du skal ikkje setja Herren din Gud på prøve.»

⁸Så tok djevelen han med seg opp på eit svært høgt fjell og synte han alle verdsens rike og deira herlegdom

⁹og sa: «Alt dette gjev eg deg om du fell ned og tilbed meg.»

¹⁰Då sa Jesus til han: «Gå frå meg, Satan! For det står skrive: Herren din Gud skal du tilbe, han og ingen annan ¬skal du tena.»

¹¹Då gjekk djevelen frå han, og englar kom og tente han.

¹²Då Jesus fekk høyra at Johannes var sett i fengsel, drog han attende til Galilea.

¹³Han flytte frå Nasaret og busette seg i Kapernaum ved Galilea-sjøen, i landet til Sebulon- og Naftali-ættene.

¹⁴Såleis skulle det oppfyllast, det som er tala gjennom profeten Jesaja:

¹⁵Du Sebulons og Naftalis land, som ligg langsmed sjøen, og landet austanfor Jordan, du Galilea, ¬som høyrer heidningar til:

¹⁶Det folket som sat i mørker, har sett eit stort ljos. For dei som bur i dødens ¬skuggeland, har ljoset gått opp.

¹⁷Frå den tid tok Jesus til å forkynna: «Vend om, for himmelriket er nær!»

¹⁸Ein gong Jesus gjekk langsmed Galilea-sjøen, fekk han sjå to brør: Simon, som vert kalla Peter, og Andreas, bror hans. Dei heldt på å kasta ei not i sjøen; for dei var fiskarar.

¹⁹Han sa til dei: «Fylg meg, så skal eg gjera dykk til menneskefiskarar!»

²⁰Då gjekk dei beint ifrå nøtene sine og fylgde han.

²¹Då Jesus kom lenger fram, fekk han sjå to andre brør: Jakob, son til Sebedeus, og Johannes, bror hans. Dei sat i båten saman med Sebedeus, far sin, og bøtte nøter. Jesus kalla dei,

²²og med ein gong gjekk dei bort frå båten og far sin og fylgde han.

²³Sidan fór Jesus ikring i heile Galilea; han lærte folket i synagogene deira, forkynte evangeliet om riket og lækte all sjukdom og vanhelse hjå dei.

²⁴Det gjekk gjetord om han over heile Syria; og dei kom til han med alle som hadde vondt og leid av ymse sjukdomar og plager, både forgjorde, månesjuke og lame, og han lækte dei. [9] [10]

²⁵Ei stor folkemengd fylgde han, frå Galilea og Dekapolis, frå Jerusalem og Judea og frå bygdene austanfor Jordan. [11]