Read nynorsk 1978 Matteus 7 Bible Online

Matteus 7 - nynorsk 1978 bible

Matteus 7

¹Døm ikkje, så de ikkje skal verta dømde!

²For de skal dømast etter den domen de feller over andre, og det skal mælast opp til dykk med det målet de sjølve mæler med.

³Kvifor ser du flisa i auga åt bror din, men bjelken i ditt eige auga vert du ikkje var?

⁴Eller korleis kan du seia til bror din: Lat meg ta flisa ut or auga ditt, når det er ein bjelke i ditt eige?

⁵Din hyklar! Ta fyrst bjelken ut or ditt eige auga! Då ser du klårt og kan ta flisa ut or auga på bror din.

⁶Gjev ikkje hundane det som er heilagt, og kast ikkje perlene dykkar for svin. Dei kjem berre til å trakka dei ned og venda seg mot dykk og riva dykk sund.

⁷Bed, så skal de få. Leita, så skal de finna. Banka på, så skal det verta opplate for dykk.

⁸For kvar den som bed, han får; og den som leitar, han finn; og den som bankar på, for han vert det opplate.

⁹Eller er det nokon av dykk som gjev son sin ein stein når han bed om brød,

¹⁰eller gjev han ein orm når han bed om ein fisk?

¹¹Når no de som er vonde, veit å gje borna dykkar gode gåver, kor mykje meir skal ikkje då Far dykkar i himmelen gje gode gåver til dei som bed han!

¹²Alt det de vil at andre skal gjera mot dykk, det skal de òg gjera mot dei. For så er lova og profetane.

¹³Gå inn gjennom den tronge porten! For vid er den porten og brei er den vegen som fører til fortaping, og mange er dei som går inn gjennom den.

¹⁴Men trong er den porten og smal er den vegen som fører til livet, og få er dei som finn han.

¹⁵Ta dykk i vare for dei falske profetane! Dei kjem til dykk i saueham, men innvendig er dei grådige ulvar.

¹⁶På fruktene skal de kjenna dei. Kan ein hausta druer av klunger eller fiken av tistlar?

¹⁷Eit godt tre ber god frukt, eit ringt tre ber ring frukt.

¹⁸Eit godt tre kan ikkje bera ring frukt, og eit ringt tre kan ikkje bera god frukt.

¹⁹Kvart tre som ikkje ber god frukt, vert hogge ned og kasta på elden.

²⁰Difor skal de kjenna dei på fruktene.

²¹Ikkje alle som seier til meg: Herre, Herre! skal koma inn i himmelriket, men dei som gjer det Far min i himmelen vil.

²²Den dagen skal mange seia til meg: Herre, Herre! Har vi ikkje tala profetord i ditt namn, og drive ut vonde ånder i ditt namn, og gjort mange mektige gjerningar i ditt namn?

²³Då skal eg seia dei beint ut: Eg har aldri kjent dykk. Gå bort frå meg, de som gjer urett!

²⁴Den som høyrer desse orda mine og gjer etter dei, han er lik ein klok mann som bygde huset sitt på fjell.

²⁵Regnet silte, elvane fløymde, og vindane bles og slo mot huset. Men det fall ikkje, for det var tufta på fjell.

²⁶Men den som høyrer desse orda mine, og ikkje gjer etter dei, han er lik ein uvitug mann som bygde huset sitt på sand.

²⁷Regnet silte, elvane fløymde, og vindane bles og slo mot huset. Då fall det, og fallet var stort.

²⁸Då Jesus hadde halde denne talen, var folket fulle av undring over læra hans.

²⁹For han lærte dei med mynde, og ikkje som deira skriftlærde.