Read nynorsk 1978 Markus 13 Bible Online

Markus 13 - nynorsk 1978 bible

Markus 13

¹Då Jesus var på veg ut frå templet, sa ein av læresveinane til han: «Meister, sjå for steinar og for byggverk!»

²Han svara: «Ja, ser du desse veldige bygningane? Her skal ikkje liggja att stein på stein; alt skal rivast ned.»

³Då han sat på Oljeberget midt imot templet, og Peter, Jakob, Johannes og Andreas var åleine med han, spurde dei han:

⁴«Sei oss: Når skal dette henda? Og kva er teiknet som syner seg når alt dette skal fullendast?»

⁵Jesus tok til ords og sa: Ta dykk i vare, så ingen fører dykk vilt!

⁶For mange skal koma i mitt namn og seia: «Det er eg.» Og dei skal føra mange på villspor.

⁷Når de høyrer om krig, og det går rykte om krig, så lat dykk ikkje skræma! Dette lyt henda, men enno er ikkje enden komen.

⁸Folk skal reisa seg mot folk, og rike mot rike, og det skal vera jordskjelv mange stader, og hungersnaud. Dette er dei fyrste føderiene.

⁹Men sjå dykk føre! Dei skal gje dykk over til domstolane og piska dykk i synagogene, og for landshovdingar og kongar skal de førast fram for mi skuld, så de kan vitna for dei.

¹⁰Og fyrst må evangeliet forkynnast for alle folkeslag.

¹¹Men når dei fører dykk bort og gjev dykk over til styremaktene, så syt ikkje for kva de skal seia, men sei det som vert gjeve dykk i same stund! For det er ikkje de som talar, men Den Heilage Ande.

¹²Bror skal senda bror i døden og ein far barnet sitt, og born skal reisa seg mot foreldra sine og valda at dei døyr.

¹³Og alle skal hata dykk for mitt namn skuld. Men den som held ut til enden, han skal verta frelst.

¹⁴Men når de ser «den øydande styggedomen» stå der han ikkje skulle stå — skjøn det, den som les! — då må dei som er i Judea, røma til fjells;

¹⁵den som er på taket, må ikkje gå ned og inn i huset og henta noko,

¹⁶og den som er ute på marka, må ikkje gå heim etter kappa si.

¹⁷Stakkars dei som ventar barn og dei som gjev bryst i dei dagane!

¹⁸Men bed at det ikkje må henda om vinteren!

¹⁹For i dei dagane skal det verta slike trengsler som det aldri har vore sidan Gud i opphavet skapte verda, og som det heller aldri meir skal verta.

²⁰Og gjorde ikkje Herren den tida kortare, så vart ikkje eit menneske frelst. Men for deira skuld som han valde ut, har han gjort den tida kortare.

²¹Om nokon då seier til dykk: «Sjå her er Messias!» eller: «Sjå der er han», så tru det ikkje!

²²For falske messiasar og falske profetar skal stå fram. Dei skal gjera teikn og under for å føra dei utvalde vilt, om det er råd.

²³Så sjå dykk føre! Eg har sagt dykk alt føreåt.

²⁴Men i dei dagane, etter denne trengselstida, skal sola mørkjast og månen missa sitt ljos.

²⁵Stjernene skal falla ned frå himmelen, og kreftene i himmelrømda skal skakast.

²⁶Då skal dei sjå Menneskesonen koma i skyene med stor makt og herlegdom.

²⁷Han skal senda ut englane og samla dei utvalde frå heimsens fire hjørne, frå ytste enden av jorda til ytste enden av himmelen.

²⁸Lær ei likning av fikentreet: Når det kjem sevje i greinene og lauvet sprett, då veit de at sommaren er nær.

²⁹Like eins når de ser at dette hender, då veit de at han er utfor døra.

³⁰Sanneleg, det seier eg dykk: Denne ætta skal ikkje forgå før alt dette hender.

³¹Himmel og jord skal forgå, men mine ord skal aldri forgå.

³²Men den dagen eller timen kjenner ingen, ikkje englane i himmelen og heller ikkje Sonen, berre Faderen.

³³Ver på vakt og vak! For de veit ikkje når tida kjem.

³⁴Det er som når ein mann skal fara utanlands: Før han fer heimanfrå, set han tenarane sine til å styra for seg. Kvar av dei får sitt å gjera, og til dørvaktaren seier han at han skal vaka.

³⁵Så vak då! For de veit ikkje kva tid husbonden kjem, anten det er om kvelden, midt på natta, når hanen gjel eller når dagen renn.

³⁶Lat han ikkje finna dykk sovande når han brått kjem.

³⁷Det eg seier til dykk, det seier eg til alle: Ver vakne!