Read nynorsk 1978 Markus 16 Bible Online

Markus 16 - nynorsk 1978 bible

Markus 16

¹Då sabbaten var til ende, kjøpte Maria Magdalena og Maria, mor til Jakob, og Salome angande olje; for dei ville gå og salva han.

²Tidleg om morgonen fyrste dagen i veka kom dei til grava, med det same sola rann.

³Dei sa seg imellom: «Kven skal vi få til å velta steinen frå gravopninga?»

⁴Men då dei såg opp, fekk dei sjå at steinen var fråvelt. Han var svært stor.

⁵Då dei kom inn i grava, såg dei ein ung mann som sat på høgre sida, kledd i ein lang, kvit kjortel. Dei vart forfærde,

⁶men han sa til dei: «Ver ikkje redde! De leitar etter Jesus frå Nasaret, han som vart krossfest. Han er oppstaden, han er ikkje her. Sjå her er staden der dei la han!

⁷Men gå av stad og sei til læresveinane hans og til Peter at han går føre dykk til Galilea. Der skal de få sjå han, som han har sagt dykk.»

⁸Då gjekk dei ut att og rømde frå grava, skjelvande av redsle. Og dei sa ikkje eit ord til nokon; for dei var redde.

⁹Då Jesus hadde stått opp att tidleg den fyrste dagen i veka, synte han seg fyrst for Maria Magdalena, som han hadde drive sju vonde ånder ut or. [19]

¹⁰Ho gjekk av stad og fortalde det til dei som hadde vore med han, og som no syrgde og gret.

¹¹Men då dei fekk høyra at han levde, og at ho hadde sett han, trudde dei det ikkje.

¹²Sidan synte han seg i ein annan skapnad for to av dei, medan dei gjekk etter vegen og skulle ut på landet.

¹³Dei òg kom og sa det til dei andre, men dei trudde ikkje dei heller.

¹⁴Til sist synte han seg for dei elleve, medan dei sat til bords. Han tala strengt til dei fordi dei var så vantruande og hardhjarta, og fordi dei ikkje trudde dei som hadde sett han etter at han hadde stått opp.

¹⁵Han sa til dei: «Gå ut i all verda og forkynn evangeliet for alle menneske!

¹⁶Den som trur og vert døypt, skal verta frelst; men den som ikkje trur, skal verta fordømd.

¹⁷Og desse teikna skal fylgja dei som trur: I mitt namn skal dei driva ut vonde ånder, dei skal tala nye tungemål,

¹⁸dei skal ta ormar i hendene, og om dei drikk drepande gift, skal det ikkje skada dei. Dei skal leggja hendene på sjuke, så dei vert friske.»

¹⁹Etter at Herren Jesus hadde sagt dette til dei, vart han teken opp til himmelen og sette seg ved Guds høgre hand.

²⁰Men dei gjekk ut og forkynte alle stader. Og Herren var med, og han stadfeste Ordet med dei teikn som fylgde med.