Read nynorsk 1978 Lukas 1 Bible Online

Lukas 1 - nynorsk 1978 bible

Lukas 1

¹Mange har alt freista å skriva opp det som hende hjå oss,

²slik vi har fått det overgjeve av dei som frå fyrste stund var augnevitne og tenarar for Ordet.

³No har eg granska alt vel frå fyrst av, og eg har sett meg føre at eg vil skriva det opp for deg i samanheng, vørde Teofilus,

⁴så du kan sjå kor påliteleg det er, det du er opplært i.

⁵I den tida då Herodes var konge i Jødeland, var det ein prest der som heitte Sakarja; han høyrde til det prestelaget som hadde namn etter Abia. Kona hans heitte Elisabet og var av Arons-ætta. [1]

⁶Begge levde etter Guds vilje. Dei fylgde alle Herrens bod og føresegner, og ingen hadde noko å seia på dei.

⁷Dei var barnlause, for Elisabet kunne ikkje få born, og no var dei begge langt uti åra.

⁸Så var det ein dag Sakarja gjorde presteteneste for Gud, for turen var komen til hans lag.

⁹Då dei kasta lodd, som prestane til vanleg gjorde, fall det på Sakarja å gå inn i Herrens tempel og brenna røykjelse på altaret.

¹⁰Heile folkemengda stod utanfor og bad medan offeret vart bore fram.

¹¹Då fekk han sjå ein Herrens engel, som stod på høgre sida av røykjelsesaltaret.

¹²Sakarja stokk ved dette synet, og det kom otte over han.

¹³Men engelen sa til han: «Ver ikkje redd, Sakarja! Gud har høyrt bøna di. Elisabet, kona di, skal føda deg ein son, og du skal kalla han Johannes. [2]

¹⁴Han skal verta til glede og hugnad for deg, og mange skal gleda seg av di han er fødd.

¹⁵For han skal vera stor i Herrens augo. Vin og sterk drikk skal han ikkje smaka, og heilt frå mors liv skal han vera fylt av Den Heilage Ande.

¹⁶Mange i Israel skal han føra attende til Herren, deira Gud.

¹⁷Sjølv skal han gå føre Herren med same ånd og kraft som Elia hadde. Og han skal venda fedrehjarto til borna, gje dei ulydige den hug som rettferdige har, og bu folket vel for Herren.» [3]

¹⁸Då sa Sakarja til engelen: «Korleis kan eg vita om dette er sant? Eg er ein gamal mann, og kona mi er òg oppi åra.»

¹⁹Engelen svara: «Eg er Gabriel, som står for Guds åsyn. Eg er send for å tala til deg og bera fram dette gledebodet.

²⁰Men fordi du ikkje trudde orda mine, skal du missa målet og ikkje kunna tala før den dagen dette hender. For det eg har sagt, skal oppfyllast i si tid.»

²¹Imedan stod folket og venta på Sakarja, og undra seg over at han drygde så lenge i templet.

²²Men då han kom ut og ikkje kunne tala med dei, skjøna dei at han hadde hatt eit syn der inne. Han gjorde berre teikn til dei; han var og vart mållaus.

²³Då tenestetida hans var ute, fór han heim att.

²⁴Ei tid etter vart Elisabet, kona hans, med barn, og ho heldt seg heime i fem månader.

²⁵«Dette har Herren gjort for meg,» sa ho. «I desse dagar har han sett til meg og teke bort vanæra mi mellom folk.» [4]

²⁶Då det leid på sjette månaden, vart engelen Gabriel send frå Gud til ein by i Galilea som heitte Nasaret,

²⁷til ei møy som var trulova med Josef, ein mann av Davids-ætta; møya heitte Maria.

²⁸Engelen kom inn til henne og sa: «Ver helsa, du som har fått nåde! Herren er med deg!»

²⁹Ved desse orda stokk ho og grunda på kva denne helsinga skulle tyda.

³⁰Men engelen sa til henne: «Ver ikkje redd, Maria! For du har funne nåde hjå Gud.

³¹Du skal verta med barn og få ein son, og du skal gje han namnet Jesus. [5]

³²Han skal vera stor og kallast Son åt Den Høgste, og Herren Gud skal gje han kongsstolen åt David, ættefar hans.

³³Han skal vera konge over Jakobsætta til evig tid, og det skal ikkje vera ende på kongedømet hans.»

³⁴Maria sa til engelen: «Korleis skal dette gå til, når eg ikkje veit av mann?»

³⁵Engelen svara: «Den Heilage Ande skal koma over deg, og krafta åt Den Høgste skal skyggja over deg. Difor skal òg barnet som vert født, vera heilagt og kallast Guds Son.

³⁶Og høyr: Elisabet, slektningen din, ventar ein son, ho òg, på sine gamle dagar. Dei sa at ho ikkje kunne få born, men no er ho alt i sjette månaden.

³⁷For ingen ting er umogeleg for Gud.»

³⁸Då sa Maria: «Eg er Herrens tenestkvinne. Lat det gå meg som du har sagt.» Så fór engelen bort att.

³⁹Nokre dagar etter drog Maria av stad og skunda seg opp i fjellbygdene, til ein by i Juda.

⁴⁰Der gjekk ho inn i huset åt Sakarja og helsa på Elisabet.

⁴¹Då Elisabet høyrde helsinga hennar Maria, rørte barnet seg i livet hennar. Ho vart fylt av Den Heilage Ande

⁴²og sa med høg røyst: «Velsigna er du mellom kvinner, og velsigna er barnet du ber.

⁴³Korleis kan det ha seg at mor åt Herren min kjem til meg?

⁴⁴For då di helsing nådde øyra mitt, hoppa barnet i meg av fryd.

⁴⁵Ja, sæl er ho som trudde at det skulle oppfyllast, det Herren hadde sagt til henne.»

⁴⁶Då sa Maria: Mi sjel høglovar Herren,

⁴⁷og mi ånd frydar seg over Gud, ¬min frelsar.

⁴⁸For han har sett ¬til si ringe tenestkvinne. Frå no av skal alle ætter ¬prisa meg sæl,

⁴⁹for store ting har han gjort ¬mot meg, han, den mektige, ¬heilagt er hans namn.

⁵⁰Hans miskunn varer ¬frå ætt til ætt for dei som har age for han.

⁵¹Storverk gjorde han ¬med sin sterke arm; han spreidde dei ¬som bar på hovmodstankar,

⁵²og støytte stormenn ned ¬frå trona, men lyfte dei låge opp.

⁵³Han metta dei svoltne ¬med gode gåver, men sende dei rike ¬tomhendte bort.

⁵⁴Han tok seg av Israel, ¬tenaren sin, så han kom i hug

⁵⁵sin lovnad til fedrane våre og synte miskunn ¬mot Abraham og hans ætt — til evig tid.

⁵⁶Maria vart verande hjå Elisabet om lag tre månader; så fór ho heim att.

⁵⁷Så kom tida då Elisabet skulle ha barn, og ho fødde ein son.

⁵⁸Og då grannane og skyldfolket hennar fekk høyra kor stor miskunn Gud hadde synt henne, gledde dei seg med henne.

⁵⁹Den åttande dagen kom dei og skulle omskjera guten. Dei ville kalla han Sakarja etter faren,

⁶⁰men mora sa: «Nei, han skal heita Johannes.»

⁶¹«Men det er då ingen i ætta di som har det namnet,» svara dei.

⁶²Så gjorde dei teikn til faren kva han ville guten skulle kallast.

⁶³Han bad om ei tavle og skreiv: «Johannes er namnet hans.» Alle undra seg,

⁶⁴men i det same fekk Sakarja att mål og mæle, og han tok til å prisa Gud.

⁶⁵Då kom det otte over alle dei som budde der ikring, og ordet om det som hadde hendt, breidde seg over alle fjellbygdene i Judea.

⁶⁶Alle som høyrde det, grunda på det og sa: «Kva skal vel dette barnet verta til?» Og Herren leidde han med si hand.

⁶⁷Sakarja, far hans, vart fylt av Den Heilage Ande og tala profetord:

⁶⁸Lova vere Herren, Israels Gud, for han har gjesta sitt folk ¬og løyst det ut.

⁶⁹Han har reist for oss ¬eit horn til frelse i sin tenar Davids ætt,

⁷⁰så som han lova ¬i gamle dagar, då han tala gjennom ¬sine heilage profetar

⁷¹om å frelsa oss frå våre fiendar og frå alle dei som hatar oss.

⁷²Han vil syna miskunn ¬mot fedrane våre og minnast si heilage pakt,

⁷³den lovnaden han gav ¬vår far Abraham med eid,

⁷⁴så vi, frelste frå fiendehand ¬og utan otte, kan tena han

⁷⁵for hans åsyn med heilag hug og rettferd alle våre dagar.

⁷⁶Og du, barn, skal kallast profet ¬for Den Høgste, for du skal gå fram føre Herren og rydja veg for han

⁷⁷og læra folket hans ¬å kjenna frelsa, at syndene deira vert tilgjevne,

⁷⁸for vår Gud er rik på miskunn. Så skal ljoset frå det høge gjesta oss som ei solrenning

⁷⁹og skina for dei som bur i mørker og dødsskugge, og styra føtene våre ¬inn på freds veg.

⁸⁰Og guten voks og vart sterk i ånda. Han heldt seg i øydemarka til den dagen han steig fram for Israel.