Read nynorsk 1978 Lukas 21 Bible Online

Lukas 21 - nynorsk 1978 bible

Lukas 21

¹Jesus såg opp og fekk sjå at dei rike la gåvene sine i tempelkista.

²Då la han merke til ei fattig enkje som la to småmyntar.

³Og han sa: «Sanneleg, det seier eg dykk: Denne fattige enkja har gjeve meir enn nokon av dei andre.

⁴For alle dei andre la gåver i kista av si overflod, men ho gav av si fattige råd, alt ho hadde å leva av.»

⁵Det var nokre som tala om templet, kor fint det var prydd med fagre steinar og tempelgåver. Då sa Jesus:

⁶«Det kjem ein dag då det de ser her, skal rivast ned; det skal ikkje liggja att stein på stein.»

⁷Då spurde dei: «Meister, når skal dette henda, og kva er teiknet på at den tida er nær?»

⁸Han svara: Ta dykk i vare, så ingen fører dykk vilt! For mange skal koma i mitt namn og seia: «Det er eg», og: «Tida er nær». Fylg ikkje etter dei!

⁹Og når de høyrer om krig og opprør, så lat dykk ikkje skræma! For fyrst må dette henda; men enden kjem ikkje straks.

¹⁰Og han heldt fram: Folk skal reisa seg mot folk og rike mot rike;

¹¹det skal koma store jordskjelv, og mange stader hungersnaud og pest, og det skal henda fælslege ting og syna seg store teikn frå himmelen.

¹²Men før alt dette hender, skal dei leggja hand på dykk og forfylgja dykk, gje dykk over til domstolen i synagogene og kasta dykk i fengsel; og de skal førast fram for kongar og landshovdingar for mitt namn skuld.

¹³Då skal de få vitna for dei.

¹⁴Legg dykk på minne at de ikkje treng tenkja ut føreåt korleis de skal svara for dykk.

¹⁵Eg skal gje dykk ord og visdom som ingen av motstandarane dykkar skal kunna stå seg for eller seia imot.

¹⁶Jamvel foreldre og sysken, skyldfolk og vener skal svika dykk og valda nokre av dykk døden.

¹⁷Og alle skal hata dykk for mitt namn skuld.

¹⁸Men ikkje eit hår på hovudet skal de missa.

¹⁹Held de ut, skal de nå fram til livet.

²⁰Når de ser Jerusalem kringsett av hærar, då skal de vita at byen snart ligg øyde.

²¹Då må dei som er i Judea, røma til fjells; dei som er i byen, må koma seg ut, og dei som er ute på landet, må ikkje gå inn i byen.

²²For straffedomstida er komen, då alt som står skrive, skal oppfyllast.

²³Stakkars dei som ventar barn og dei som gjev bryst i dei dagane! For det skal verta stor naud i landet; vreidedomen skal råka dette folket.

²⁴Dei skal falla for sverd og førast bort som fangar til alle folkeslag. Og andre folk skal trakka Jerusalem under fot til dess tida åt folkeslaga er ute.

²⁵Det skal syna seg teikn i sol og måne og stjerner, og på jorda skal folka verta gripne av redsle og rådløyse når hav og brotsjøar dyn.

²⁶Folk skal forgå av redsle og gru for det som kjem over jorda. For kreftene i himmelrømda skal skakast.

²⁷Då skal dei sjå Menneskesonen koma i skya med stor makt og herlegdom.

²⁸Men når dette tek til å henda, då rett dykk opp og lyft hovudet! For utløysinga dykkar er nær.

²⁹Så fortalde han dei ei likning: Sjå på fikentreet og alle andre tre.

³⁰Når de ser at lauvet sprett, då veit de at sommaren er nær.

³¹Såleis òg når de ser at dette hender, då veit de at Guds rike er nær.

³²Sanneleg, det seier eg dykk: Denne ætta skal ikkje forgå før alt dette hender.

³³Himmel og jord skal forgå, men mine ord skal aldri forgå.

³⁴Ta dykk i vare, og lat ikkje hjarta dykkar tyngjast av svir og drikk eller verdslege suter, så den dagen kjem uventa på dykk

³⁵som ei snare. For han skal koma over alle som bur på heile jorda.

³⁶Vak kvar tid og stund, og bed om styrke så de kan koma velberga frå alt dette som skal henda, og stå dykk for Menneskesonen.

³⁷Om dagen var Jesus i templet og lærte folket, men om kvelden gjekk han ut til den høgda som heiter Oljeberget, og var der om natta.

³⁸Og tidleg om morgonen flokka folket seg om han i templet og høyrde på han.