Read nynorsk 1978 Lukas 3 Bible Online

Lukas 3 - nynorsk 1978 bible

Lukas 3

¹Det var i det femtande styringsåret åt keisar Tiberius. Pontius Pilatus var då landshovding i Judea, Herodes var fylkeskonge i Galilea, Filip, bror hans, i Iturea og Trakonitis, Lysanias i Abilene, [8] [9] [10]

²og Annas og Kaifas var øvsteprestar. Då kom Guds ord til Johannes, son åt Sakarja, i øydemarka.

³Og han fór omkring i heile Jordan-landet, og forkynte at folket skulle venda om og la seg døypa, så dei kunne få tilgjeving for syndene sine,

⁴som det står skrive i boka med orda åt profeten Jesaja: Ei røyst ropar i øydemarka: Ryd veg for Herren, gjer stigane hans rette!

⁵Kvar dal skal fyllast, kvart fjell, kvar haug ¬skal jamnast. Dei krokete vegane ¬skal rettast ut, dei ujamne stigane verta slette.

⁶Og alle menneske ¬skal sjå Guds frelse.

⁷I flokk og fylgje drog folk ut til Johannes og ville at han skulle døypa dei. Men han sa: «Ormeyngel! Kven har lært dykk korleis de skal sleppa unna den straffedomen som skal koma?

⁸Så ber då frukt som svarar til omvendinga! Kom ikkje og sei: Vi har Abraham til far. For eg seier dykk: Gud kan reisa opp born for Abraham av desse steinane.

⁹Øksa ligg alt innmed rota på trea; kvart tre som ikkje ber god frukt, vert hogge ned og kasta på elden.»

¹⁰«Kva skal vi då gjera?» spurde folket.

¹¹Han svara: «Den som har to kjortlar, skal dela med den som ingen har, og den som har mat, skal gjera det same.»

¹²Det kom òg nokre tollarar og ville verta døypte. Dei spurde: «Meister, kva skal vi gjera?»

¹³«Krev ikkje meir enn de har rett til,» svara han.

¹⁴«Kva så med oss,» spurde nokre soldatar, «kva skal vi gjera?» Han svara: «Truga ikkje pengar frå nokon med vald eller falske klagemål, men ver nøgde med løna dykkar.»

¹⁵Folket gjekk no i venting, og alle tenkte med seg at Johannes kanskje var Messias.

¹⁶Då tok han til ords og sa til dei alle: «Eg døyper dykk med vatn. Men det kjem ein som er sterkare enn eg. Eg er ikkje eingong verdig til å løysa sandalreima hans. Han skal døypa dykk med Heilag Ande og eld.

¹⁷Han har kasteskufla i handa, og han skal reinsa kornet på treskjevollen og samla kveiten i løa si. Men agnene skal han brenna med eld som aldri sloknar.»

¹⁸Dette og mykje anna la han folket på hjarta medan han bar fram bodskapen sin.

¹⁹Men då han refste fylkeskongen Herodes fordi han levde med Herodias, brorkona si, og gjorde mykje anna vondt,

²⁰la Herodes ei ny misgjerning attåt alle dei andre: Han kasta Johannes i fengsel.

²¹Alt folket lét seg no døypa, og Jesus òg vart døypt. Då hende det medan han stod og bad, at himmelen opna seg,

²²og Den Heilage Ande dala ned over han i dueskapnad. Og det kom ei røyst frå himmelen: «Du er Son min, som eg elskar. Deg har eg hugnad i!»

²³Jesus var ikring tretti år gamal då han tok til med si gjerning. Folk meinte at han var son til Josef, som var son til Eli,

²⁴son til Mattat, son til Levi, son til Melki, son til Jannai, son til Josef,

²⁵son til Mattatja, son til Amos, son til Nahum, son til Esli, son til Naggai,

²⁶son til Ma’at, son til Mattatja, son til Sjimi, son til Josek, son til Joda,

²⁷son til Johanan, son til Resa, son til Serubabel, son til Sealtiel, son til Neri,

²⁸son til Melki, son til Addi, son til Kosam, son til Elmadam, son til Er,

²⁹son til Josva, son til Elieser, son til Jorim, son til Mattat, son til Levi,

³⁰son til Simeon, son til Juda, son til Josef, son til Jonam, son til Eljakim,

³¹son til Melea, son til Manna, son til Mattata, son til Natan, son til David,

³²son til Isai, son til Obed, son til Boas, son til Salma, son til Naksjon,

³³son til Amminadab, son til Admin, son til Arni, son til Hesron, son til Peres, son til Juda,

³⁴son til Jakob, son til Isak, son til Abraham, son til Tarah, son til Nakor,

³⁵son til Serug, son til Re’u, son til Peleg, son til Eber, son til Sjelah,

³⁶son til Kenan, son til Arpaksjad, son til Sem, son til Noah, son til Lamek,

³⁷son til Metusjalah, son til Enok, son til Jared, son til Mahalalel, son til Kenan,

³⁸son til Enosj, son til Set, son til Adam, Guds son.