Read nynorsk 1978 Lukas 4 Bible Online

Lukas 4 - nynorsk 1978 bible

Lukas 4

¹Fylt av Den Heilage Ande kom Jesus attende frå Jordan. Og Anden førte han ikring i øydemarka,

²der han vart freista av djevelen i førti dagar. I denne tida åt han ingenting, og då dei førti dagane var til ende, var han svolten.

³Då sa djevelen til han: «Er du Guds Son, så sei til denne steinen at han skal verta til brød.»

⁴Men Jesus svara: «Det står skrive: Mennesket lever ikkje berre av brød.»

⁵Då førte djevelen han høgt opp og synte han alle heimsens rike i ein augneblink

⁶og sa: «Eg vil gje deg makt over alt dette og la deg få all denne herlegdomen. For det er lagt i mi hand, og eg gjev det til kven eg vil.

⁷Fell du no ned og tilbed meg, skal det vera ditt alt saman.»

⁸Då svara Jesus: «Det står skrive: Herren din Gud skal du tilbe, han og ingen annan ¬skal du tena.»

⁹Så tok djevelen han med seg til Jerusalem, sette han på det ytste hjørnet av tempelmuren og sa: «Er du Guds Son, så kast deg ned herifrå.

¹⁰For det står skrive: Han skal gje englane sine påbod ¬om deg at dei skal verna deg.

¹¹Og: Dei skal bera deg på hendene, så du ikkje støyter foten ¬på nokon stein.»

¹²Men Jesus svara: «Det er sagt: Du skal ikkje setja Herren ¬din Gud på prøve.»

¹³Då no djevelen hadde freista han med alt dette, heldt han seg borte frå han ei tid.

¹⁴Så fór Jesus attende til Galilea, fylt av den krafta som Anden gav. Og ordet om han kom ut i alle bygdene der ikring.

¹⁵Han lærte folket i synagogene, og alle tala vel om han.

¹⁶Han kom òg til Nasaret, der han var oppvaksen, og på sabbaten gjekk han inn i synagoga, som han var van med. Då han reiste seg og ville lesa frå Skrifta,

¹⁷gav dei han boka åt profeten Jesaja. Han opna bokrullen og fann den staden der det står:

¹⁸Herrens Ande er over meg, for han har salva meg ¬til å forkynna ein gledebodskap for fattige. Han har sendt meg for å ropa ut at fangar skal få fridom, og at blinde skal få sjå, for å løysa dei trælka or tvang

¹⁹og ropa ut eit nådeår ¬frå Herren.

²⁰Så rulla han bokrullen saman, gav han til tenaren og sette seg. Og alle som var i synagoga, heldt augo sine feste på han.

²¹Då tala han til dei og byrja såleis: «I dag vart dette skriftordet oppfylt medan de høyrde på.»

²²Alle lét vel om han og undra seg over dei herlege orda som kom frå hans munn. «Er ikkje dette son til Josef?» spurde dei.

²³Då sa Jesus til dei: «De kjem sikkert til å minna meg om ordtaket: Lækjar, læk deg sjølv! og seia: Vi har høyrt om alt du har gjort i Kapernaum; gjer no det same på heimstaden din!»

²⁴Og han heldt fram: «Sanneleg, det seier eg dykk: Ingen profet er velkomen på heimstaden sin.

²⁵Ja, eg seier dykk som sant er: Det var mange enkjer i Israel medan Elia levde, då himmelen var stengd i tre år og seks månader, og det vart ei stor hungersnaud i heile landet.

²⁶Likevel vart ikkje Elia send til nokon av dei, men berre til ei enkje i Sarepta i Sidon-landet.

²⁷Og det var mange spedalske i Israel den tid profeten Elisja levde, men ingen av dei vart reine att, berre syraren Na’aman.»

²⁸Då vart dei brennande harme, alle som var i synagoga og høyrde dette.

²⁹Dei fór opp og dreiv han ut or byen og bort på stupet av det fjellet som byen deira var bygd på; der ville dei støyta han utfor.

³⁰Men han gjekk midt igjennom flokken og fór sin veg.

³¹Så tok Jesus vegen ned til Kapernaum, ein by i Galilea, og der lærte han folket på sabbaten.

³²Dei var tekne av undring over læra hans, for han tala med makt og mynde.

³³I synagoga var det ein mann som hadde ei urein ånd. Han sette i og ropa:

³⁴«Kva har du med oss å gjera, Jesus frå Nasaret? Er du komen for å tyna oss? Eg veit kven du er, du Guds Heilage!»

³⁵Men Jesus truga ånda og sa: «Tei still, og far ut or han!» Den vonde ånda kasta mannen ned midt imellom dei og fór ut or han, men skadde han ikkje.

³⁶Då kom det otte over alle, og dei sa seg imellom: «Kva er dette for tale? Med makt og mynde byd han dei ureine åndene, og dei fer ut.»

³⁷Og gjetordet om han fór over alle bygdene der ikring.

³⁸Frå synagoga gjekk Jesus heim til Simon. Vermor åt Simon låg sjuk og hadde høg feber, og dei bad Jesus hjelpa henne.

³⁹Han gjekk bort til henne og truga feberen så han sleppte henne. Og med ein gong stod ho opp og stelte for dei.

⁴⁰Då sola gladde, kom alle til han med sine sjuke, kva sjukdom dei så drogst med. Og han la hendene på kvar einskild av dei og lækte dei.

⁴¹Mange fór det vonde ånder ut or, og dei skreik og ropa: «Du er Guds Son!» Men han truga dei og gav dei ikkje lov til å tala. For dei visste at han var Messias.

⁴²Då det vart morgon dagen etter, drog han ut or byen og fór til ein øydestad. Folket leita etter han, og då dei kom dit han var, prøvde dei å halda han att, så han ikkje skulle gå frå dei.

⁴³Men han sa: «Eg lyt bera fram den glade bodskapen om Guds rike i dei andre byane òg. Det er det eg er send for.»

⁴⁴Og han heldt ved og tala ordet i synagogene i Jødeland.