Read nynorsk 1978 5. Mosebok 13 Bible Online

5. Mosebok 13 - nynorsk 1978 bible

5. Mosebok 13

¹Det kan henda at det står fram ein profet mellom dykk eller ein som har draumsyner, og lovar deg eit teikn eller under.

²Og går det som han spår, og han samstundes seier: «Kom, lat oss halda oss til andre gudar, som de ikkje kjenner, og dyrka dei»,

³då skal du ikkje høyra på det som ein slik profet eller draumsjåar seier. For Herren dykkar Gud vil berre prøva dykk og sjå om de elskar Herren dykkar Gud av heile dykkar hjarta og heile dykkar hug.

⁴Herren dykkar Gud skal de fylgja, og han skal de ottast. Hans bod skal de halda, og hans ord skal de lyda; han skal de tena og halda dykk til.

⁵Men profeten eller draumsjåaren skal drepast fordi han lokka dykk til fråfall frå Herren dykkar Gud, som førte deg ut or Egypt og løyste deg or trælehuset, og fordi han ville få deg bort frå den vegen som Herren din Gud har sagt at du skal gå. Såleis skal du rydja ut det vonde hjå deg.

⁶Det kan henda at bror din, som har same mor som du, eller son din eller dotter di, eller kona di som du tek i famn, eller venen din som du har så kjær som ditt eige liv, lokkar deg i løynd og seier: «Lat oss gå av og dyrka andre gudar!» — gudar som korkje du eller fedrane dine har kjent,

⁷gudar som folka rundt ikring dykk dyrkar, anten nær ved eller langt borte, frå den eine enden av jorda til den andre.

⁸Då skal du ikkje gjera han til viljes og ikkje lyda han. Du skal ikkje ha medkjensle med han, ikkje spara han og ikkje halda di hand over han.

⁹Men du skal ta livet av han. Sjølv skal du vera den fyrste som lyfter handa mot han, og sidan skal heile folket gjera det same.

¹⁰Du skal steina han i hel, fordi han prøvde å lokka deg bort frå Herren din Gud, som førte deg ut or Egypt, or trælehuset.

¹¹Og heile Israel skal høyra om det og reddast, så dei aldri meir gjer så stygg ei gjerning mellom dykk.

¹²Det kan henda du høyrer einkvan seia om ein av dei byane Herren din Gud gjev deg til å bu i,

¹³at det har stige fram gudlause menn mellom dykk og lokka folket i byen med slike ord: «Lat oss gå bort og dyrka andre gudar» — gudar som de ikkje kjenner.

¹⁴Då skal du granska saka vel, røkja etter og spørja deg føre. Syner det seg då at eit slikt skjemdarverk verkeleg er gjort hjå deg,

¹⁵skal du hogga ned folket i den byen med sverd. Du skal bannstøyta han og alt som i han er. Jamvel buskapen skal du hogga ned med sverd.

¹⁶Alt hærfanget som er teke der, skal du samla midt på torget. Og du skal brenna byen og hærfanget som eit heiloffer til Herren din Gud. Sidan skal byen liggja i røys og aldri byggjast opp att.

¹⁷Du må ikkje halda på eit grann av det som er bannlyst. Då skal Herren la sin brennande vreide fara og syna deg medkjensle. Og i si medkjensle skal han auka ætta di, som han med eid lova fedrane dine,

¹⁸så sant du lyder Herren din Gud og held alle boda hans som eg gjev deg i dag, og gjer det som rett er i hans augo.