Read nynorsk 1978 5. Mosebok 16 Bible Online

5. Mosebok 16 - nynorsk 1978 bible

5. Mosebok 16

¹Akta på månaden abib! Då skal du halda påske for Herren din Gud. For i abib månad, ved nattetider, førte Herren din Gud deg ut or Egypt.

²Til påskeoffer åt Herren din Gud skal du slakta sauer og oksar på den staden Herren vel ut til bustad åt namnet sitt.

³Attåt offerkjøtet må du ikkje eta syrt brød. I sju dagar skal du eta usyrt brød, trengselsbrød; for du laut skunda deg ut or Egypt. Såleis skal du, så lenge du lever, minnast den dagen du tok ut frå Egypt.

⁴I sju dagar må det ikkje finnast surdeig innan grensene dine. Og av det du slaktar om kvelden den fyrste dagen, må ingen ting liggja natta over, til morgons.

⁵Du må ikkje slakta påskeofferet heime, i nokon av dei byane Herren din Gud gjev deg,

⁶men berre på den staden Herren din Gud vel ut til bustad åt namnet sitt. Der skal du slakta påskeofferet, om kvelden, når sola glader, på same tid som då du tok ut frå Egypt.

⁷Du skal koka og eta det på den staden Herren din Gud vel seg ut. Og om morgonen kan du fara heim att til telta dine.

⁸Seks dagar skal du eta usyrt brød. Men den sjuande dagen skal det vera høgtidssamling for Herren din Gud. Då må du ikkje gjera noko arbeid.

⁹Så skal du telja sju veker fram. Frå den dagen du lèt sigden gå i kornet, skal du rekna dei sju vekene.

¹⁰Då skal du halda sjuvekehelga for Herren din Gud og bera fram dei friviljuge gåvene dine, alt etter som Herren din Gud velsignar deg.

¹¹Og du skal gleda deg for Herren din Guds åsyn på den staden Herren din Gud vel ut til bustad åt namnet sitt, både du og son din og dotter di, trælen din og trælkvinna di, levittane som bur i byane dine, og innflyttaren, den farlause og enkja som er hjå deg.

¹²Kom i hug at du sjølv var træl i Egypt, og legg vinn på å leva etter desse føresegnene.

¹³Når du har samla inn frå treskjevoll og vinpresse, skal du halda lauvhyttehelga i sju dagar.

¹⁴Du skal gleda deg på denne høgtida, både du og son din og dotter di, trælen din og trælkvinna di, levitten og innflyttaren, den farlause og enkja som bur i byane dine.

¹⁵I sju dagar skal du halda høgtid for Herren din Gud på den staden Herren vel seg ut. For Herren din Gud vil velsigna deg og alt det du avlar, og alt det du tek deg føre. Difor skal du storleg gleda deg.

¹⁶Tre gonger om året skal alle mennene dine stiga fram for Herren din Gud på den staden han vel seg ut: i usyrdebrødshelga, sjuvekehelga og lauvhyttehelga. Ingen må visa seg tomhendt for Herrens åsyn.

¹⁷Kvar skal koma med den gåva han har råd til, alt etter den velsigning Herren din Gud har gjeve deg.

¹⁸I alle dei byane Herren din Gud gjev deg, skal du setja inn domarar og tilsynsmenn for ættene dine, og dei skal døma folket med lov og rett.

¹⁹Du skal ikkje rengja retten og ikkje gjera skil på folk og ikkje ta muter. For mutene gjer vise menn blinde og skader saka for dei som har rett.

²⁰Rettferd, ja rettferd skal du jaga etter. Då skal du få leva og ta i eige det landet som Herren din Gud gjev deg.

²¹Du skal ikkje setja opp nokon Asjera-påle, ikkje planta noko tre attmed altaret som du byggjer åt Herren din Gud.

²²Og du skal ikkje reisa noka steinstøtte, for det hatar Herren din Gud.