Read nynorsk 1978 5. Mosebok 20 Bible Online

5. Mosebok 20 - nynorsk 1978 bible

5. Mosebok 20

¹Når du dreg ut i krig mot fiendane dine og får auga på hestar og vogner, ein hær som er større enn din, så ver ikkje redd dei! For Herren din Gud er med deg, han som førte deg opp frå Egypt.

²Før de går til strid, skal presten stiga fram, tala til hæren

³og seia: «Høyr, Israel! I dag går de til strid mot fiendane dykkar. Miss ikkje motet, og ver ikkje redde! Røm ikkje, og lat dykk ikkje skræma av dei!

⁴For Herren dykkar Gud går med dykk. Han vil strida for dykk mot fiendane og gje dykk siger.»

⁵Så skal tilsynsmennene tala til hæren og seia: «Er det nokon som har bygt seg nytt hus, men endå ikkje vigsla det, kan han fara heim att, så ikkje ein annan skal vigsla huset om han fell i krigen.

⁶Er det nokon som har planta ein vingard, men endå ikkje teke han i bruk, kan han fara heim att, så ikkje ein annan skal ta vingarden i bruk om han fell i krigen.

⁷Og er det nokon som har trulova seg med ei kvinne, men endå ikkje gift seg med henne, kan han fara heim att, så ikkje ein annan skal gifta seg med henne om han fell i krigen.»

⁸Dette òg skal tilsynsmennene seia til hæren: «Er det nokon som er redd og motlaus, kan han fara heim att, så ikkje våpenbrørne hans skal missa motet liksom han.»

⁹Når så tilsynsmennene er ferdige med det dei har å seia, skal dei setja hovdingar over hæren.

¹⁰Når du dreg fram mot ein by og vil strida mot han, skal du fyrst by han fred.

¹¹Tek folket i byen imot fredstilbodet og opnar portane for deg, skal dei alle gjera tvangsarbeid for deg.

¹²Vil dei ikkje gjera fred, men føra krig med deg, skal du kringsetja byen.

¹³Og når Herren din Gud gjev han i dine hender, skal du hogga ned alle mennene der med sverd.

¹⁴Men kvinnene, borna og husdyra og alt anna hærfang i byen kan du ta med deg. Du kan gjera deg nytte av dette hærfanget som Herren din Gud lèt deg ta frå fiendane dine.

¹⁵Såleis skal du fara fram i alle byane som ligg langt borte frå deg og ikkje høyrer folka her til.

¹⁶Men i dei byane som høyrer desse folka til, og som Herren din Gud gjev deg til odel og eige, der skal du ikkje spara eit einaste liv.

¹⁷Du skal bannstøyta dei, både hetittane, amorittane, kanaanearane, perisittane, hevittane og jebusittane, så som Herren din Gud har sagt deg.

¹⁸Elles kunne dei læra dykk å ta etter alt det stygge dei sjølve har gjort for gudane sine, så de syndar mot Herren dykkar Gud.

¹⁹Når du strider mot ein by og må halda han kringsett i lang tid før du kan ta han, skal du ikkje bruka øks på trea der og øydeleggja dei. Du kan eta av dei, men du må ikkje hogga dei ned. Trea på marka er då ikkje menneske, så du skulle ta på dei òg.

²⁰Men tre som du veit ikkje ber etande frukt, kan du øydeleggja. Dei kan du hogga ned og bruka til å byggja bolverk mot den byen du strider mot, til han fell.