Read nynorsk 1978 5. Mosebok 23 Bible Online

5. Mosebok 23 - nynorsk 1978 bible

5. Mosebok 23

¹Den som har fått steinane knuste eller mannslemen oppskoren, får ikkje vera med i Herrens lyd.

²Den som er fødd i blanda ekteskap, får ikkje vera med i Herrens lyd. Jamvel etterkomarane hans til tiande leden skal vera utestengde frå Herrens lyd.

³Ingen ammonitt eller moabitt får vera med i Herrens lyd. Jamvel etterkomarane deira til tiande leden skal vera utestengde frå Herrens lyd.

⁴For dei møtte dykk ikkje på vegen med brød og vatn då de kom frå Egypt, men dei leigde Bileam, son til Beor, frå Petor i Mesopotamia til å forbanna deg.

⁵Men Herren din Gud ville ikkje høyra på Bileam. Han vende forbanninga om til velsigning for deg, fordi han hadde deg kjær.

⁶Aldri skal du, så lenge du lever, bry deg om deira velferd og lukke.

⁷Men edomittane skal du ikkje ha uvilje mot, for dei er brørne dine. Og heller ikkje skal du avsky egyptarane, for du har vore innflyttar i landet deira. [26]

⁸Etterkomarane deira i tredje leden kan få vera med i Herrens lyd.

⁹Når du dreg i krig mot fiendane dine og slår leir, skal du akta deg for alt som er usømeleg.

¹⁰Er ein av dykk urein etter sæduttøming om natta, skal han gå ut or leiren og ikkje koma inn att

¹¹før det lid til kvelds. Då skal han vaska seg, og når sola glader, kan han koma inn i leiren.

¹²Utanfor leiren skal det vera ein stad som du kan gå til.

¹³Mellom reiskapane dine skal du ha ein kjepp, og med den skal du grava ned avføringa når du har sete der ute.

¹⁴For Herren din Gud går ikring i leiren; han vil berga deg og gje fiendane i dine hender. Difor skal leiren vera heilag, og Herren må ikkje sjå noko ufyse hjå deg; for då vender han seg bort frå deg.

¹⁵Når ein træl har rømt frå herren sin og søkt livd hjå deg, skal du ikkje senda han attende til herren hans.

¹⁶Lat han få bu kvar han vil i landet ditt, i ein av byane dine, der han likar seg best. Og ver ikkje hard mot han!

¹⁷Mellom israelittane må det ikkje finnast kvinne eller mann som driv tempel-utukt.

¹⁸Kom ikkje til huset åt Herren din Gud med pengar som ei kvinne eller ein mann får for å driva utukt, om du så har lova det. Alle slike pengar er ein styggedom for Herren din Gud. [27]

¹⁹Du skal ikkje krevja rente av ein landsmann; korkje for pengar eller mat eller noko anna skal du ta rente. [28]

²⁰Av utlendingar kan du krevja rente, men ikkje av ein landsmann. Då skal Herren din Gud velsigna deg i alt du tek deg føre i det landet du går inn i og legg under deg.

²¹Når du gjer ein lovnad til Herren din Gud, må du ikkje drya med å halda det du har lova. Elles kjem Herren din Gud til å krevja det av deg, og du fører skuld over deg.

²²Lèt du vera å lova noko, vert du ikkje skuldig.

²³Men det du eingong har sagt, må du leggja vinn på å gjera. For av fri vilje og med eigen munn har du gjeve Herren din Gud lovnaden.

²⁴Når du kjem inn i annan manns vingard, kan du eta så mykje druer du vil, til du er mett. Men du må ikkje sanka i spann.

²⁵Når du kjem inn på annan manns åker, kan du ta aks med handa. Men med sigd må du ikkje koma i annan manns åker.