Read nynorsk 1978 5. Mosebok 27 Bible Online

5. Mosebok 27 - nynorsk 1978 bible

5. Mosebok 27

¹Moses og dei eldste i Israel tala til folket og sa: Akta på alle dei boda eg gjev dykk i dag.

²Den dagen de går over Jordan og kjem inn i det landet Herren din Gud gjev deg, skal du reisa nokre store steinar og stryka kalk på dei.

³Når du kjem over, skal du skriva alle boda i denne lova på dei, så du kan få koma inn i det landet Herren din Gud gjev deg, eit land som fløymer med mjølk og honning, så som Herren, dine fedrars Gud, lova deg.

⁴Når de kjem over Jordan, skal de reisa desse steinane, så som eg byd dykk i dag, på Ebal-fjellet, og stryka kalk på dei.

⁵Og der skal du byggja eit altar åt Herren din Gud, eit altar av stein som du ikkje har brukt bitjern på. [33]

⁶Av steinar som ikkje er tilhogne, skal du byggja altaret åt Herren din Gud, og på det skal du bera fram brennoffer til Herren din Gud.

⁷Så skal du ofra måltidsoffer og eta der og gleda deg for Herren din Guds åsyn.

⁸Og på steinane skal du klårt og greitt skriva alle boda i denne lova.

⁹Moses og levittprestane tala såleis til heile Israel: «Ver still og høyr etter, Israel! Denne dagen har du vorte eit folk som høyrer Herren din Gud til.

¹⁰Så ver då lydig mot Herren din Gud, og hald boda og føresegnene hans, som eg gjev deg i dag!»

¹¹Same dagen tala Moses til folket og sa:

¹²Når de har gått over Jordan, skal desse ættene stå på Garisim-fjellet og lysa velsigning over folket: Simeon, Levi, Juda, Jissakar, Josef og Benjamin.

¹³Og desse skal stå på Ebal-fjellet og lysa forbanning: Ruben, Gad, Asjer, Sebulon, Dan og Naftali.

¹⁴Levittane skal ta til ords og seia med høg røyst til kvar mann i Israel:

¹⁵Forbanna vere den som lagar eit utskore eller støypt gudebilete, ein styggedom for Herren, eit verk av kunstnarhand, og set det opp i løynd! Og heile folket skal svara: Amen.

¹⁶Forbanna vere den som vanærar far sin eller mor si! Og heile folket skal seia: Amen.

¹⁷Forbanna vere den som flytter merkesteinar mellom seg og grannen! Og heile folket skal seia: Amen.

¹⁸Forbanna vere den som fører ein blind på galen veg! Og heile folket skal seia: Amen.

¹⁹Forbanna vere den som rengjer retten for innflyttarar, farlause og enkjer! Og heile folket skal seia: Amen.

²⁰Forbanna vere den som ligg med kona åt far sin! Han vanærar lega åt far sin. Og heile folket skal seia: Amen.

²¹Forbanna vere den som har omgang med dyr! Og heile folket skal seia: Amen.

²²Forbanna vere den som ligg med syster si, dotter til far sin eller mor si! Og heile folket skal seia: Amen.

²³Forbanna vere den som ligg med mor til kona si! Og heile folket skal seia: Amen.

²⁴Forbanna vere den som slår i hel ein landsmann i løynd! Og heile folket skal seia: Amen.

²⁵Forbanna vere den som tek muter og slår i hel ein skuldlaus mann! Og heile folket skal seia: Amen.

²⁶Forbanna vere den som ikkje held orda i denne lova og lever etter dei! Og heile folket skal seia: Amen.