Read nynorsk 1978 5. Mosebok 34 Bible Online

5. Mosebok 34 - nynorsk 1978 bible

5. Mosebok 34

¹Så gjekk Moses frå Moab-slettene opp på Nebo, som er den høgste tinden på Pisga-fjellet og ligg midt for Jeriko. Og Herren synte han heile landet: Gilead alt til Dan,

²heile Naftali, Efraim- og Manasse-landet og heile Juda radt til havet i vest,

³Negev og Jordan-sletta, dalen ved Jeriko, Palmebyen, alt ned til Soar.

⁴Og Herren sa til han: «Dette er det landet som eg med eid lova Abraham, Isak og Jakob at eg ville gje ætta deira. No har eg late deg sjå det for augo dine, men du får ikkje koma inn i det.»

⁵Så døydde Moses, Herrens tenar, der i Moab, som Herren hadde sagt.

⁶Og han gravla han nede i dalen i Moab, midt for Bet-Peor. Og til denne dag har ingen visst kvar grava hans er.

⁷Moses var hundre og tjue år gamal då han døydde. Men endå hadde han ikkje dimst på synet, og livskrafta var ikkje kvorven.

⁸Israelittane syrgde over Moses på Moab-slettene i tretti dagar; då var syrgjetida ute.

⁹Men Josva Nunsson var fylt med visdomsånd, fordi Moses hadde lagt hendene på han. Og israelittane lydde han og gjorde som Herren hadde sagt Moses føre.

¹⁰Aldri meir steig det fram i Israel ein profet som Moses, som Herren gav seg til kjenne for, åsyn til åsyn.

¹¹Kom i hug alle dei teikn og under Herren sende han til å gjera i Egypt, med farao og alle tenarane hans og heile landet hans.

¹²Og kom i hug den sterke handa og alle dei store, agelege gjerningane som Moses gjorde for augo på heile Israel.