Read nynorsk 1978 5. Mosebok 6 Bible Online

5. Mosebok 6 - nynorsk 1978 bible

5. Mosebok 6

¹Dette er dei bod, føresegner og domar som Herren dykkar Gud sa at eg skulle læra dykk, og som de skal leva etter i det landet de er på veg til og skal leggja under dykk.

²Du skal ottast Herren din Gud så lenge du lever, og halda alle føresegnene og boda hans som eg gjev deg, både du og son din og soneson din, så du kan få eit langt liv.

³Så høyr då, Israel! Legg vinn på å leva etter Herrens bod! Då skal det gå deg vel, og de skal aukast og verta mange i det landet som fløymer med mjølk og honning, så som Herren, dine fedrars Gud, har lova deg.

⁴Høyr, Israel! Herren er vår Gud, Herren er éin. [8]

⁵Du skal elska Herren din Gud av heile ditt hjarta og av heile din hug og av all di makt.

⁶Desse orda og boda som eg gjev deg i dag, skal du gøyma i hjarta ditt.

⁷Du skal prenta dei inn i borna dine og tala om dei når du sit heime og når du går på vegen, når du legg deg og når du står opp.

⁸Du skal binda dei på handa di til eit merke og bera dei på panna som ein minnesetel

⁹og skriva dei på dørstolpane i huset ditt og på portane dine.

¹⁰No vil Herren din Gud føra deg inn i det landet som han med eid lova fedrane dine, Abraham, Isak og Jakob, at han ville gje deg. Der er det store, fine byar som du ikkje har bygt,

¹¹hus fulle av alle gode ting som du ikkje har samla, utgravne brunnar som du ikkje har grave, vingardar og oliventre som du ikkje har planta. Når du kjem dit og får eta deg mett,

¹²ta deg då i vare så du ikkje gløymer Herren, som førte deg ut or Egypt, or trælehuset.

¹³Herren din Gud skal du ottast, han skal du tena, og ved hans namn skal du sverja.

¹⁴Hald dykk ikkje til andre gudar, som grannefolka dykkar dyrkar.

¹⁵For Herren din Gud, som er midt imellom dykk, han er ein brennhuga Gud. Han kunne harmast på deg og rydja deg ut frå jorda.

¹⁶De skal ikkje setja Herren dykkar Gud på prøve, så som de gjorde ved Massa.

¹⁷Legg vinn på å halda dei lover, bod og føresegner som Herren dykkar Gud har gjeve deg,

¹⁸og gjer det som er rett og godt i hans augo. Då skal det gå deg vel, og du skal få koma inn i det gode landet som Herren svor at han ville gje fedrane dine, og ta det i eige.

¹⁹Herren skal driva ut alle fiendar for deg, så som han har sagt.

²⁰Når son din sidan spør deg korleis det har seg med dei bod, føresegner og domar som Herren vår Gud har gjeve dykk,

²¹skal du svara: «Vi var trælar hjå farao i Egypt, men Herren førte oss ut or Egypt med sterk hand.

²²Med eigne augo såg vi korleis Herren i Egypt gjorde store teikn og under som førte ulukke over farao og heile hans hus.

²³Men oss førte han ut derifrå, for han ville leia oss inn i det landet som han med eid hadde lova fedrane våre, og gje oss det.

²⁴Då baud han oss å halda alle desse føresegnene og ottast Herren vår Gud, så det skulle gå oss vel alle dagar, og han kunne la oss leva, som han har gjort til denne dag.

²⁵Når vi legg vinn på å leva etter alle desse boda som Herren vår Gud har gjeve oss, då står vi rettferdige for han.»