Read nynorsk 1978 Johannes 1 Bible Online

Johannes 1 - nynorsk 1978 bible

Johannes 1

¹I opphavet var Ordet, og Ordet var hjå Gud, og Ordet var Gud.

²Han var i opphavet hjå Gud.

³Alt vart til ved han, og utan han vart ikkje noko til av det som har vorte til.

⁴I han var liv, og livet var ljoset for menneska.

⁵Og ljoset skin i mørkret, men mørkret tok ikkje imot det.

⁶Det stod fram ein mann, send av Gud; Johannes var namnet hans.

⁷Han kom for å vitna; han skulle vitna om ljoset, så alle kunne koma til tru ved han.

⁸Det var ikkje han som var ljoset, men han skulle vitna om ljoset.

⁹Det sanne ljoset som lyser for kvart menneske, kom no til verda.

¹⁰Han var i verda, og verda har vorte til ved han, men verda kjende han ikkje.

¹¹Han kom til sitt eige, og hans eigne tok ikkje imot han.

¹²Men alle som tok imot han, dei gav han rett til å verta Guds born, dei som trur på namnet hans.

¹³Dei er ikkje fødde av kjøt og blod, ikkje av menneskevilje og ikkje av manns vilje, men av Gud.

¹⁴Og Ordet vart menneske og tok bustad mellom oss, og vi såg hans herlegdom, ein herlegdom som den einborne Sonen har frå Far sin, full av nåde og sanning.

¹⁵Johannes vitnar om han og ropar ut: «Det var om han eg sa: Han som kjem etter meg, er komen framom meg, for han var til før meg.»

¹⁶Av hans fullnad har vi alle fått, og det nåde over nåde.

¹⁷For lova vart gjeven ved Moses; nåden og sanninga kom ved Jesus Kristus.

¹⁸Ingen har nokon gong sett Gud; men den einborne, som er Gud, og som er i Faderens fang, han har synt oss kven han er.

¹⁹Dette er det vitnemålet Johannes gav då jødane sende nokre prestar og levittar frå Jerusalem, som skulle spørja han: «Kven er du?»

²⁰Då sa han beint ut og sanna: «Eg er ikkje Messias.»

²¹«Kven er du då?» spurde dei. «Er du Elia?» «Nei, det er eg ikkje,» svara han. «Er du profeten?» «Nei,» sa han. [1]

²²«Sei oss då kven du er,» sa dei, «så vi kan ha eit svar til dei som har sendt oss. Kva seier du om deg sjølv?»

²³Han sa: «Eg er ei røyst som ropar i øydemarka: Gjer vegen bein for Herren, som profeten Jesaja har sagt.»

²⁴Nokre av dei som var sende, høyrde til farisearane,

²⁵og dei spurde: «Kvifor døyper du då, når du ikkje er Messias og ikkje Elia og heller ikkje profeten?»

²⁶Johannes svara: «Eg døyper med vatn. Men midt imellom dykk står ein som de ikkje kjenner,

²⁷han som kjem etter meg, og som eg ikkje er verdig til å løysa skoreima åt.»

²⁸Dette hende i Betania på hi sida av Jordan, der Johannes var og døypte.

²⁹Dagen etter ser han Jesus koma bort imot seg og seier: «Sjå, der er Guds lam, som ber verdsens synd!

³⁰Det var om han eg sa: Etter meg kjem ein mann som er komen framom meg, for han var til før meg.

³¹Eg visste heller ikkje kven han var, men eg er komen og døyper med vatn så han skal openberrast for Israel.»

³²Og Johannes vitna: «Eg såg Anden dala ned som ei due frå himmelen, og han vart verande over han.

³³Eg visste heller ikkje kven han var, men han som sende meg for å døypa med vatn, han sa til meg: Den du ser Anden dalar ned imot og vert verande over, han er den som døyper med Den Heilage Ande.

³⁴Og eg har sett det, og dette er vitnemålet mitt: Han er Guds Son.»

³⁵Dagen etter stod atter Johannes der med to av læresveinane sine.

³⁶Då såg han Jesus koma gåande og sa: «Sjå, der er Guds lam!»

³⁷Dei to læresveinane høyrde kva han sa, og fylgde etter Jesus.

³⁸Jesus snudde seg, og då han såg at dei fylgde etter, sa han: «Kva vil de?» Dei spurde: «Kvar bur du, rabbi?» Rabbi tyder lærar.

³⁹«Kom og sjå,» svara Jesus. Så gjekk dei med han og såg kvar han budde; og dei vart verande hjå han den dagen. Det var ikring den tiande timen.

⁴⁰Andreas, bror til Simon Peter, var ein av dei to som hadde høyrt det Johannes sa, og fylgt etter Jesus.

⁴¹Han finn fyrst bror sin, Simon, og seier til han: «Vi har funne Messias.» Messias er det same som Den Salvevigde.

⁴²Så tok han Simon med seg til Jesus. Jesus såg på han og sa: «Du er Simon, son til Johannes. Du skal heita Kefas.» Kefas er det same som Peter.

⁴³Dagen etter ville Jesus fara til Galilea. Då møtte han Filip og sa til han: «Fylg meg!»

⁴⁴Filip var frå Betsaida, same byen som Andreas og Peter var ifrå.

⁴⁵Filip møtte Natanael og sa til han: «Vi har funne han som Moses har skrive om i lova, og som profetane har skrive om: Det er Jesus frå Nasaret, son til Josef.»

⁴⁶«Kan det koma noko godt frå Nasaret?» spurde Natanael. «Kom og sjå!» svara Filip.

⁴⁷Jesus såg Natanael koma bort imot seg og sa: «Sjå, der er ein ekte israelitt, ein som det ikkje finst svik i.»

⁴⁸«Kvar kjenner du meg ifrå?» spurde Natanael. Jesus svara: «Eg såg deg då du var under fikentreet, før Filip ropa på deg.»

⁴⁹Då sa Natanael: «Rabbi, du er Guds Son, du er Israels konge.»

⁵⁰«Trur du fordi eg sa at eg såg deg under fikentreet?» spurde Jesus. «Du skal få sjå større ting enn det.»

⁵¹Og han sa: «Sanneleg, sanneleg, det seier eg dykk: De skal sjå himmelen open og Guds englar stiga opp og stiga ned over Menneskesonen.»