Read nynorsk 1978 Johannes 15 Bible Online

Johannes 15 - nynorsk 1978 bible

Johannes 15

¹Eg er det sanne vintreet, og Far min er vingardsmannen.

²Kvar grein på meg som ikkje ber frukt, tek han bort; og kvar grein som ber frukt, reinsar han så ho skal bera meir frukt.

³De er alt reine på grunn av det ordet eg har tala til dykk.

⁴Ver i meg, så er eg i dykk. Som greina ikkje kan bera frukt av seg sjølv, men berre når ho er på vintreet, såleis kan ikkje de heller bera frukt utan at de er i meg.

⁵Eg er vintreet, de er greinene. Den som er i meg, og eg i han, han ber mykje frukt; men skilde frå meg kan de ingen ting gjera.

⁶Den som ikkje vert verande i meg, vert kasta ut som ei grein og visnar. Folk samlar saman greinene og kastar dei på elden, og dei brenn.

⁷Vert de verande i meg, og vert orda mine verande i dykk, så bed om kva de vil, og de skal få det.

⁸På den måten vert Far min herleggjord at de ber mykje frukt, og de skal vera mine læresveinar.

⁹Som Faderen har elska meg, har eg elska dykk. Ver i min kjærleik!

¹⁰Held de boda mine, er de i min kjærleik, liksom eg har halde boda til Far min og er i hans kjærleik.

¹¹Dette har eg tala til dykk så mi glede kan vera i dykk, og gleda dykkar kan vera fullkomen.

¹²Og det er bodet mitt: De skal elska kvarandre som eg har elska dykk.

¹³Ingen har større kjærleik enn den som gjev livet sitt for venene sine.

¹⁴De er venene mine så sant de gjer det eg byd dykk.

¹⁵Eg kallar dykk ikkje tenarar lenger, for tenaren veit ikkje kva herren hans gjer. Eg kallar dykk vener, for eg har sagt dykk alt eg har høyrt av Far min.

¹⁶De har ikkje valt ut meg, men eg har valt ut dykk og sett dykk til å gå ut og bera frukt, frukt som varer. Då skal Faderen gje dykk alt de bed om i mitt namn.

¹⁷Dette er det eg byd dykk: De skal elska kvarandre!

¹⁸Når verda hatar dykk, skal de vita at ho har hata meg fyrst.

¹⁹Hadde de vore av verda, då hadde verda elska sitt eige. Men de er ikkje av verda; eg har valt dykk ut or verda. Difor hatar verda dykk.

²⁰Kom i hug det ordet eg sa dykk: Ein tenar er ikkje større enn herren sin. Har dei forfylgt meg, vil dei forfylgja dykk òg. Har dei halde fast på mitt ord, vil dei halda fast på dykkar ord òg.

²¹Men alt dette kjem dei til å gjera mot dykk for mitt namn skuld, fordi dei ikkje kjenner han som har sendt meg.

²²Var eg ikkje komen, og hadde eg ikkje tala til dei, då hadde dei vore utan skuld. Men no har dei ingen ting å orsaka synda si med.

²³Den som hatar meg, hatar Far min òg.

²⁴Hadde eg ikkje gjort slike gjerningar mellom dei som ingen annan har gjort, hadde dei vore utan skuld. Men no har dei sett dei, og likevel hatar dei både meg og Far min.

²⁵Men det ordet som står i lova deira, skulle oppfyllast: Dei hata meg utan grunn.

²⁶Når talsmannen kjem, han som eg skal senda dykk frå Faderen, Sanningsanden som går ut frå Faderen, då skal han vitna om meg.

²⁷Men de òg skal vitna, for de har vore med meg frå det fyrste.