Read nynorsk 1978 Johannes 2 Bible Online

Johannes 2 - nynorsk 1978 bible

Johannes 2

¹Tredje dagen stod det eit bryllaup i Kana i Galilea. Mor til Jesus var der,

²og Jesus og læresveinane hans var òg bedne.

³Då det var slutt på vinen, sa Jesu mor til han: «Dei har ikkje meir vin.»

⁴«Kva har du med mitt å gjera, kvinne?» svara Jesus. «Min time er enno ikkje komen.»

⁵Mor hans sa då til tenarane: «Det han seier dykk, skal de gjera.»

⁶No stod det nokre vasskar av stein der, som skikken var etter dei føreskriftene jødane hadde om reinsing. Det var seks kar, og kvart av dei tok to eller tre anker.

⁷«Fyll kara med vatn,» sa Jesus. Og tenarane fylte dei til randa.

⁸Så sa han til dei: «Aus no opp og ber det til kjøkemeisteren.» Dei så gjorde.

⁹Kjøkemeisteren smaka på vatnet, som hadde vorte til vin. Han visste ikkje kvar vinen kom ifrå, men tenarane som hadde aust opp vatnet, visste det. Då ropa han på brudgomen

¹⁰og sa: «Alle set fyrst fram den gode vinen, og når gjestene er drukne, kjem dei med den ringare. Du har gøymt den gode vinen til no.»

¹¹Dette fyrste teiknet sitt gjorde Jesus i Kana i Galilea. Han openberra herlegdomen sin, og læresveinane hans trudde på han.

¹²Sidan fór han ned til Kapernaum saman med mor si og brørne og læresveinane sine, og der vart dei verande nokre dagar.

¹³Det leid no til påskehelga åt jødane, og Jesus fór opp til Jerusalem.

¹⁴På tempelplassen såg han dei som selde oksar, sauer og duer, og pengevekslarane som sat der.

¹⁵Då laga han seg ei svepe av reip og dreiv dei alle ut or heilagdomen, og sauene og oksane med. Pengane åt pengevekslarane kasta han utover og velte borda deira,

¹⁶og til dei som selde duer, sa han: «Bort med dette! Gjer ikkje huset åt Far min til ein marknad!»

¹⁷Då kom læresveinane hans i hug at det står skrive: Brennhug for ditt hus kjem til å eta meg opp.

¹⁸Då tok jødane til ords og spurde han: «Kan du syna oss eit teikn på at du har rett til å gjera dette?»

¹⁹Jesus svara: «Riv ned dette templet, og eg skal reisa det opp att på tre dagar.»

²⁰Då sa jødane: «I førtiseks år har dei bygt på dette templet, og du vil reisa det opp att på tre dagar?»

²¹Men det templet han tala om, var lekamen hans.

²²Då han hadde stått opp frå dei døde, kom læresveinane hans i hug at han hadde sagt dette, og dei trudde Skrifta og det ordet Jesus hadde sagt.

²³Medan han var i Jerusalem i påskehelga, kom mange til tru på namnet hans, for dei såg dei teikna han gjorde.

²⁴Men Jesus trudde seg ikkje til dei, for han kjende dei alle.

²⁵Han trong ikkje til vitnemål frå andre om noko menneske, for han visste sjølv kva som budde i mennesket.