Read nynorsk 1978 Johannes 21 Bible Online

Johannes 21 - nynorsk 1978 bible

Johannes 21

¹Sidan openberra Jesus seg endå ein gong for læresveinane; det var ved Tiberias-sjøen, og gjekk såleis til:

²Simon Peter, Tomas, som vart kalla Tvillingen, Natanael frå Kana i Galilea, Sebedeus-sønene og to andre av læresveinane hans var i lag der.

³Simon Peter seier til dei andre: «Eg vil av og fiska.» «Vi går med, vi òg,» sa dei. Så gjekk dei av stad og steig i båten; men den natta fekk dei ikkje noko.

⁴Då det tok til å dagast, stod Jesus på stranda, men læresveinane visste ikkje at det var han.

⁵Jesus sa til dei: «De har vel ikkje noko fisk, born?» «Nei,» svara dei.

⁶«Kast nota på høgre sida av båten, så får de fisk,» sa han. Dei kasta nota, og då greidde dei ikkje å dra henne opp, så mykje fisk hadde dei fått.

⁷Den læresveinen som Jesus hadde kjær, sa til Peter: «Det er Herren.» Då Simon Peter høyrde at det var Herren, batt han kappa om seg — den hadde han teke av — og hoppa i sjøen.

⁸Dei andre læresveinane kom med båten og drog nota med fisken etter seg. Dei var ikkje langt frå land, berre to hundre alner om lag.

⁹Då dei kom i land, fekk dei sjå ein glohaug der med fisk på og brød.

¹⁰«Kom hit med noko av den fisken de fekk,» sa Jesus til dei.

¹¹Simon Peter gjekk då ut i båten og drog nota på land. Ho var full av store fiskar, eit hundre og femtitre i alt. Men endå det var så mange, rivna ikkje nota.

¹²Jesus sa til dei: «Kom og få mat!» Ingen av læresveinane våga å spørja han: «Kven er du?» Dei visste at det var Herren.

¹³Då gjekk Jesus fram, tok brødet og gav dei, og like eins fisken.

¹⁴Dette var tredje gongen Jesus openberra seg for læresveinane etter at han hadde stått opp frå dei døde.

¹⁵Då dei hadde halde måltid, sa Jesus til Simon Peter: «Simon Johannesson, elskar du meg meir enn desse?» «Ja, Herre,» svara han, «du veit at eg held av deg.» Jesus seier til han: «Fød lamma mine!»

¹⁶Og han seier til han andre gongen: «Simon Johannesson, elskar du meg?» «Ja, Herre,» svara Peter, «du veit at eg held av deg.» Jesus seier til han: «Gjæt sauene mine!»

¹⁷Så seier han tredje gongen: «Simon Johannesson, held du av meg?» Peter tykte det var leitt at Jesus tredje gongen spurde: «Held du av meg?» Og han svara: «Herre, du veit alt; du veit at eg held av deg.» Jesus seier til han: «Fød sauene mine!

¹⁸Sanneleg, sanneleg, det seier eg deg: Då du var ung, batt du sjølv beltet om deg og gjekk dit du ville. Men når du vert gamal, skal du retta ut hendene, og ein annan skal binda beltet om deg og føra deg dit du ikkje vil.»

¹⁹Det sa han for å syna kva slag død han skulle æra Gud med. Då han hadde sagt dette, sa han til Peter: «Fylg meg!»

²⁰Peter snudde seg og såg at den læresveinen som Jesus hadde kjær, fylgde etter. Det var han som hadde bøygt seg nærare innåt Jesus då dei heldt måltid, og spurt: «Herre, kven er det som skal svika deg?»

²¹Då Peter såg han, sa han til Jesus: «Herre, korleis skal det så gå med han?»

²²Jesus svara: «Om eg vil at han skal leva til eg kjem, kva har du med det? Fylg du meg!»

²³Så kom det ordet ut mellom brørne: «Den læresveinen skal ikkje døy.» Men Jesus sa ikkje at han ikkje skulle døy; det han sa, var: «Om eg vil at han skal leva til eg kjem, kva har du med det?»

²⁴Det er den læresveinen som vitnar om desse ting og har skrive dette. Og vi veit at vitnemålet hans er sant.

²⁵Det er òg mykje anna som Jesus har gjort. Skulle det skrivast opp, kvar ting for seg, trur eg ikkje heile verda kunne røma dei bøkene som då måtte skrivast.