Read nynorsk 1978 Johannes 9 Bible Online

Johannes 9 - nynorsk 1978 bible

Johannes 9

¹Då Jesus gjekk frametter, fekk han sjå ein mann som hadde vore blind frå han var fødd.

²Læresveinane spurde: «Rabbi, kven er det som har synda, han eller foreldra hans, sidan han vart fødd blind?»

³Jesus svara: «Korkje han eller foreldra hans har synda. Men det hende for at Guds gjerningar skulle syna seg på han.

⁴Så lenge det er dag, må vi gjera hans gjerningar som har sendt meg. Det kjem ei natt då ingen kan arbeida.

⁵Medan eg er i verda, er eg ljoset for verda.»

⁶Då han hadde sagt det, spytta han på jorda og laga ei gjørme og smurde på augo til mannen.

⁷Så sa han til han: «Gå og vask deg i Siloa-dammen.» Siloa tyder «utsend». Mannen gjekk dit og vaska seg, og då han kom att, kunne han sjå.

⁸Grannane og dei som før hadde sett at han tigga, sa då: «Er ikkje dette han som sat og bad seg?»

⁹«Jau, det er han,» sa somme. Andre sa: «Nei, men han er lik han.» Sjølv sa han: «Det er eg.»

¹⁰«Korleis vart augo dine opna?» spurde dei.

¹¹Han svara: «Den mannen som heiter Jesus, laga ei gjørme og smurde på augo mine og sa: Gå til Siloa og vask deg! Eg gjekk dit, og då eg hadde vaska meg, kunne eg sjå.»

¹²«Kvar er denne mannen?» spurde dei. «Eg veit ikkje,» svara han.

¹³Så førte dei han som hadde vore blind, til farisearane.

¹⁴Det var sabbat den dagen Jesus hadde laga gjørma og opna augo hans.

¹⁵Farisearane òg spurde korleis han hadde fått synet. «Han la ei gjørme på augo mine,» svara mannen, «så vaska eg meg, og no ser eg.»

¹⁶Då sa nokre av farisearane: «Denne mannen er ikkje frå Gud, sidan han ikkje held sabbaten.» Andre sa: «Korleis kan ein syndig mann gjera slike teikn?» Det vart usemje mellom dei om dette.

¹⁷Så spurde dei den blinde på nytt: «Kva meiner du om han, sidan det var dine augo han opna?» «Han er ein profet,» svara mannen.

¹⁸Jødane ville ikkje tru at han hadde vore blind og fått synet, før dei hadde henta foreldra hans. Dei sende bod etter dei

¹⁹og spurde: «Er dette dykkar son, han som de seier er fødd blind? Korleis har det seg då at han kan sjå?»

²⁰Foreldra svara: «Vi veit at dette er vår son, og at han er fødd blind.

²¹Men korleis det har seg at han no kan sjå, det veit vi ikkje; og heller ikkje veit vi kven som har opna augo hans. Spør han sjølv! Han er gamal nok til å svara for seg.»

²²Dette sa dei fordi dei var redde jødane. For jødane hadde alt vorte samde om at den som sanna at Jesus var Messias, skulle støytast ut or synagoga.

²³Difor sa foreldra hans: «Han er gamal nok, spør han sjølv!»

²⁴Andre gongen henta dei han som hadde vore blind, og sa til han: «Gjev Gud ære og tilstå! Vi veit at denne mannen er ein syndar.»

²⁵Han svara: «Om han er ein syndar, det veit eg ikkje. Men eitt veit eg: Eg var blind, og no ser eg.»

²⁶«Kva gjorde han med deg?» spurde dei. «Korleis opna han augo dine?»

²⁷«Eg har alt sagt dykk det,» sa han, «og de ville ikkje høyra på meg. Kvifor vil de høyra det om att? Kan henda de òg vil verta læresveinane hans?»

²⁸Dei skjelte han ut og sa: «Du er hans læresvein, vi er læresveinane til Moses.

²⁹Vi veit at Gud har tala til Moses, men om denne mannen veit vi ikkje kvar han er ifrå.»

³⁰«Det er då underleg,» sa mannen, «at de ikkje veit kvar han er ifrå, endå han har opna augo mine.

³¹Vi veit at Gud ikkje høyrer på syndarar, men han høyrer på den som har age for han og gjer etter hans vilje.

³²Frå opphavs tid har det aldri vore spurt at nokon har opna augo på ein blindfødd.

³³Var ikkje denne mannen frå Gud, kunne han ingen ting gjera.»

³⁴Dei svara: «Du er fødd syndar tvers igjennom, og du vil læra oss?» Så kasta dei han ut.

³⁵Jesus fekk høyra at dei hadde kasta han ut, og då han møtte han, spurde han: «Trur du på Menneskesonen?»

³⁶Mannen svara: «Kven er han, Herre, så eg kan tru på han?»

³⁷«Du har sett han,» sa Jesus. «Det er han som no talar med deg.»

³⁸«Eg trur, Herre,» sa mannen og kasta seg ned for han.

³⁹Då sa Jesus: «Til dom er eg komen til denne verda, så dei som ikkje ser, skal sjå, og dei som ser, skal verta blinde.»

⁴⁰Nokre av farisearane som stod der, høyrde dette og sa til han: «Kan henda vi òg er blinde?»

⁴¹Jesus svara: «Var de blinde, hadde de inga skuld. Men no seier de at de ser, og difor er og vert de skuldige.