Read nynorsk 1978 Apostelgjerningane 3 Bible Online

Apostelgjerningane 3 - nynorsk 1978 bible

Apostelgjerningane 3

¹Ein dag då det leid til bønetimen, som er den niande timen, gjekk Peter og Johannes opp til templet.

²Då kom det nokre berande med ein mann som hadde vore lam all si tid. Kvar dag sette dei han ned ved den tempelporten som kallast Fagerporten, så han kunne be dei som gjekk inn i templet, om ei sælebotsgåve.

³Som han fekk auga på Peter og Johannes på veg inn, bad han dei òg om ei gåve.

⁴Dei feste augo på han, og Peter sa: «Sjå på oss!»

⁵Han så gjorde, for han vona dei ville gje han noko.

⁶Men Peter sa: «Sølv og gull eig eg ikkje; men det eg har, det gjev eg deg. I namnet åt Jesus Kristus, nasarearen, byd eg deg: Stå opp og gå!»

⁷Så tok han mannen i høgre handa og reiste han opp. Og straks fekk han styrke i føtene og okla.

⁸Han spratt opp, stod på føtene og tok til å gå ikring. Så fylgde han dei inn på tempelplassen, snart gjekk han og snart sprang han, alt medan han lova Gud.

⁹Alle såg korleis han gjekk ikring og lova Gud.

¹⁰Og dei kjende han att: Det var han som var van å sitja ved Fagerporten og be om gåver, og dei vart fylte av undring og otte over det som hadde hendt med han.

¹¹Mannen heldt seg nær Peter og Johannes, og alt folket flokka seg ikring dei i Salomos bogegang, fulle av undring. [6]

¹²Då Peter såg det, tok han til å tala til folket: Kvifor undrast de over dette, israelittar? Kvifor stirer de på oss, som om det var av eiga kraft eller gudsfrykt vi gjorde at denne mannen kan gå?

¹³Nei, Abrahams og Isaks og Jakobs Gud, våre fedrars Gud, har teke tenaren sin, Jesus, opp i herlegdom. De sveik han og fornekta han for Pilatus, som hadde sett seg føre å gje han fri.

¹⁴De fornekta Den Heilage og Rettferdige og bad om å få ein mordar frigjeven.

¹⁵Men livsens hovding drap de, han som Gud vekte opp frå dei døde; det er vi vitne om.

¹⁶Fordi vi trur på Jesu namn, har dette namnet styrkt denne mannen som de ser og kjenner. Den tru vi får gjennom dette namnet, gav mannen denne fulle førleiken, som de alle kan sjå.

¹⁷Eg veit nok, brør, at det var i vankunne de gjorde dette, nett som rådsherrane dykkar.

¹⁸Men på denne måten oppfylte Gud det han føreåt hadde late alle profetane forkynna, at hans Messias skulle lida.

¹⁹Gjer difor bot og vend om, så syndene dykkar kan verta utstrokne.

²⁰Då skal det koma tider med lindring og trøyst frå Herren, og han skal senda den Messias som er etla åt dykk, Jesus.

²¹Han lyt vera i himmelen til den tid kjem då det skal atterreisast, alt det som Gud har tala om frå eldgamle dagar gjennom dei heilage profetane sine.

²²Moses sa: Herren Gud skal reisa opp ein profet som meg mellom dykk, ein av dykkar eigne brør. Han skal de høyra på i alt det han seier dykk.

²³Men kvar og ein som ikkje høyrer på den profeten, skal rydjast ut or folket.

²⁴Alle profetane som har tala, heilt frå Samuel, har forkynt det som hender i desse dagar.

²⁵De er born åt profetane, og for dykk gjeld den pakta som Gud gjorde med fedrane dykkar då han sa til Abraham: I di ætt skal alle ætter på jorda velsignast.

²⁶Det var til dykk Gud fyrst sende tenaren sin; han skulle velsigna dykk når kvar og ein vender om frå sine vonde gjerningar.