Read nynorsk 1978 Romarane 10 Bible Online

Romarane 10 - nynorsk 1978 bible

Romarane 10

¹Brør, mitt hjartans ynske og mi bøn til Gud for dei er at dei må verta frelste.

²For det vitnemålet må eg gje dei at dei brenn for Guds sak, men ikkje med skjøn.

³Dei kjenner ikkje Guds rettferd, men prøver å byggja si eiga rettferd; difor har dei ikkje bøygt seg inn under rettferda frå Gud.

⁴For Kristus er endelykta åt lova, så kvar den som trur, vert rettferdig for Gud.

⁵Moses skriv om den rettferd som lova gjev: Den som held lova, skal leva ved lova.

⁶Men rettferda av tru seier: Tenk ikkje med deg sjølv: Kven skal fara opp til himmelen? — det vil seia for å henta Kristus ned —

⁷eller: Kven skal stiga ned i avgrunnen? — det vil seia for å henta Kristus opp frå dei døde.

⁸Men kva seier ho? Ordet er deg nær, i munnen din og i hjarta ditt. Det er ordet om trua, det som vi forkynner.

⁹For sannar du med munnen din at Jesus er Herre, og trur du i hjarta ditt at Gud reiste han opp frå dei døde, då skal du verta frelst.

¹⁰Med hjarta trur vi så vi vert rettferdige for Gud, og med munnen sannar vi så vi vert frelste.

¹¹Skrifta seier: Ingen som trur på han, skal verta til skammar.

¹²For her er det ingen skilnad på jøde og grekar: Alle har dei same Herren, og han er rik nok for alle som kallar på han.

¹³Kvar den som kallar på Herrens namn, skal verta frelst.

¹⁴Men korleis kan dei kalla på ein som dei ikkje trur på? Og korleis kan dei tru på ein som dei ikkje har høyrt om? Og korleis kan dei høyra utan at einkvan forkynner?

¹⁵Og korleis kan dei forkynna dersom dei ikkje vert utsende? Det står då skrive: Kor herleg det lyder når dei kjem, dei som ber gledebod!

¹⁶Men ikkje alle var lydige mot evangeliet. Jesaja seier: Herre, kven trudde bodskapen vår?

¹⁷Så kjem då trua av bodskapen ein høyrer, og bodskapen kjem ved Kristi ord.

¹⁸Har dei ikkje høyrt? spør eg. Jau, sanneleg: Røysta deira har nått ¬over heile jorda, deira ord til heimsens endar.

¹⁹Men så spør eg: Kan henda Israel ikkje har skjøna det? Fyrst seier Moses: Eg vil eggja dykk til misunning mot dei som ikkje er eit folk, på eit uvitug folk vil eg ¬gjera dykk harme.

²⁰Og Jesaja går så langt at han seier: Eg vart funnen av dei ¬som ikkje søkte meg; eg openberra meg for dei som ikkje spurde etter meg.

²¹Men om Israel seier han: Heile dagen rette eg ut ¬mine hender til eit ulydig og trassig folk.