Read nynorsk 1978 Romarane 16 Bible Online

Romarane 16 - nynorsk 1978 bible

Romarane 16

¹Eg vil leggja inn eit godt ord hjå dykk for Føbe, syster vår; ho gjer teneste i kyrkjelyden i Kenkreæ.

²Ta imot henne i Herren, som det sømer seg for kristne. Gjev henne den hjelp ho treng å få av dykk. Sjølv har ho vore til hjelp for mange, for meg òg.

³Helsa Priska og Akvilas, medarbeidarane mine i Kristi Jesu teneste.

⁴Dei våga livet for å berga meg. Det har ikkje berre eg, men alle dei heidningkristne kyrkjelydane grunn til å takka dei for.

⁵Helsa òg kyrkjelyden som samlast heime hjå dei. Helsa min kjære Epainetos; han var den fyrste som vart vunnen for Kristus i Asia. [10]

⁶Helsa Maria, som har arbeidt så mykje for dykk.

⁷Helsa Andronikus og Junias, landsmennene mine, som har sete i fengsel saman med meg. Dei har eit godt namn mellom apostlane, og dei vart kristne før meg.

⁸Helsa Ampliatus, min kjære kristne ven.

⁹Helsa Urbanus, medarbeidaren vår i Kristi teneste, og min kjære Stakys.

¹⁰Helsa Apelles, han som har stått si prøve som kristen. Helsa Aristobolus og huslyden hans.

¹¹Helsa Herodion, landsmannen min. Helsa dei kristne i huslyden hjå Narkissos.

¹²Helsa Tryfena og Tryfosa som arbeider for Herren. Helsa den kjære Persis, som har arbeidt så mykje for Herren.

¹³Helsa Rufus, Herrens utvalde, og mor hans; ho har vore ei mor for meg òg.

¹⁴Helsa Asynkritos, Flegon, Hermes, Patrobas, Hermas og brørne som er saman med dei.

¹⁵Helsa Filologus og Julia, Nerevs og syster hans og like eins Olympas, og alle dei heilage som er saman med dei.

¹⁶Helsa kvarandre med ein heilag kyss. Alle Kristi kyrkjelydar helsar dykk. [11]

¹⁷Eg legg dykk på hjarta, brør: Hald auga med dei som går imot den læra de har motteke, og med det skaper usemje og fører andre til fall. Hald dykk frå dei.

¹⁸Slike menneske tener ikkje vår Herre Jesus Kristus, men sin eigen buk. Med fine ord og lokkande tale fører dei godtruande menneske på avveg.

¹⁹Men alle har høyrt om den lydnad de syner, og difor gleder eg meg over dykk. Eg vil at de skal vera kloke i det som godt er, og uskyldige i det som vondt er.

²⁰Gjev fredens Gud snart må knusa Satan under føtene dykkar! Vår Herre Jesu nåde vere med dykk!

²¹Timoteus, medarbeidaren min, og Lukius, Jason og Sosipater, landsmennene mine, helsar dykk.

²²Eg, Tertius, som har skrive ned brevet, helsar dykk i Herren.

²³Gaius, som er vert for meg og heile kyrkjelyden, helsar dykk. Erastus, rekneskapsføraren i byen, helsar dykk, like eins Kvartus, bror vår.

²⁴Vår Herre Jesu Kristi nåde være med dere alle! Amen. [12]

²⁵Lova vere Gud, han som har makt til å styrkja dykk med mitt evangelium, bodskapen om Jesus Kristus, etter openberringa av den løyndomen som har vore duld frå evige tider,

²⁶men som no er komen for dagen. Gjennom profetiske skrifter og etter påbod frå den evige Gud er han no kunngjord for alle folkeslag for å føra dei til lydnad og tru.

²⁷Han, den einaste vise Gud, skal ha ære ved Jesus Kristus i all æve! Amen.