Read nynorsk 1978 Romarane 6 Bible Online

Romarane 6 - nynorsk 1978 bible

Romarane 6

¹Kva skal vi då seia? Skal vi halda fram i synda, så nåden kan verta så mykje større?

²Langt ifrå! Vi som har døytt frå synda, korleis kan vi framleis leva i synda?

³Eller veit de ikkje at alle vi som vart døypte til Kristus Jesus, vart døypte til døden hans?

⁴Vi vart gravlagde med han då vi vart døypte med denne dåpen til døden. Og liksom Kristus vart oppreist frå dei døde ved Faderens veldige kraft, skal vi òg leva eit nytt liv.

⁵Har vi vakse saman med Kristus i ein død som er lik hans, skal vi òg vera eitt med han i ei oppstode som er lik hans.

⁶Vi veit at vårt gamle menneske vart krossfest med han, for at den lekamen som er under synda, skulle gjerast til inkjes, og vi ikkje lenger træla under synda.

⁷For synda har ikkje lenger nokon rett over den som er død.

⁸Men er vi døde med Kristus, då trur vi at vi òg skal leva med han.

⁹Vi veit at når Kristus er oppreist frå dei døde, døyr han ikkje meir, for døden har ikkje lenger makt over han.

¹⁰Då han døydde, gjorde han opp med synda ein gong for alle. Det livet han no lever, lever han for Gud.

¹¹På same måten skal de rekna dykk som døde for synda, men levande for Gud i Kristus Jesus.

¹²Lat då ikkje synda rå i dykkar døyelege lekam, så de gjev etter for lystene i lekamen.

¹³Og byd ikkje fram lemene dykkar til rådvelde for synda, så dei vert våpen for uretten. Men byd dykk sjølve fram til teneste for Gud, så de brukar lemene for han, til våpen for det som er rett. De var då døde og har fått liv.

¹⁴Synda skal ikkje vera herre over dykk. De er då ikkje under lova, men under nåden.

¹⁵Kva så? Skal vi synda, sidan vi ikkje er under lova, men under nåden? Langt ifrå!

¹⁶De veit at når de steller dykk til rådvelde for einkvan og lyder han, då vert de trælar under den som rår over dykk; anten vert de trælar under synda, og det fører til død, eller under lydnaden, og det fører til rettferd.

¹⁷Men Gud vere takk! De som før træla under synda, har no av hjarta vorte lydige mot den læra som vart dykk overgjeven.

¹⁸De har vorte frigjorde frå synda og er trælar for rettferda —

¹⁹eg brukar eit bilete frå dagleglivet fordi de er skrøpelege menneske. Før baud de fram lemene dykkar til teneste for umoral og urett, og det førte berre til endå meir urett. Men no skal de by fram lemene dykkar til teneste for det som er rett, så de kan verta helga.

²⁰Medan de træla under synda, var de ikkje bundne av det som er rett.

²¹Kva slag frukt hausta de av det? Slikt som de no skjemmest ved, for det fører til døden.

²²Men no er de frigjorde frå synda og har vorte tenarar for Gud; og frukta av det er eit liv i helging og til sist evig liv.

²³For den løn synda gjev, er døden, men Guds nådegåve er evig liv i Kristus Jesus, vår Herre.