Read nynorsk 1978 1. Korintar 13 Bible Online

1. Korintar 13 - nynorsk 1978 bible

1. Korintar 13

¹Om eg talar med mennesketunger og engletunger, men ikkje har kjærleik, då er eg ein ljomande malm eller ei klingande bjølle.

²Om eg har profetgåve og kjenner alle løyndomar og eig all kunnskap, og om eg har all tru, så eg kan flytta fjell, men ikkje har kjærleik, då er eg ingen ting.

³Om eg gjev alt eg eig til mat for dei fattige, ja, om eg gjev meg sjølv til å brennast, men ikkje har kjærleik, då gagnar det meg ingen ting.

⁴Kjærleiken er langmodig, kjærleiken er velviljug, han misunner ikkje, briskar seg ikkje, blæs seg ikkje opp.

⁵Kjærleiken gjer ikkje noko usømeleg, han søkjer ikkje sitt eige, harmast ikkje, gøymer ikkje på det vonde.

⁶Han gleder seg ikkje ved urett, men gleder seg ved sanninga.

⁷Alt held han ut, alt trur han, alt vonar han, alt toler han.

⁸Kjærleiken fell aldri bort. Profetgåvene skal få ende, tungene skal tagna, og kunnskapen skal ta slutt.

⁹For vi skjønar stykkevis og talar profetisk stykkevis.

¹⁰Men når det fullkomne kjem, skal det som er stykkevis, få ende.

¹¹Då eg var barn, tala eg som eit barn, tenkte eg som eit barn, dømde eg som eit barn. Men då eg vart mann, la eg av det barnslege.

¹²No ser vi som i ein spegel, i ei gåte; men då skal vi sjå åsyn til åsyn. No kjenner eg stykkevis, men då skal eg kjenna fullt ut, liksom eg fullt ut er kjend av Gud.

¹³Så vert dei verande desse tre: tru, von og kjærleik. Og størst av dei er kjærleiken.