Read nynorsk 1978 1. Korintar 16 Bible Online

1. Korintar 16 - nynorsk 1978 bible

1. Korintar 16

¹Når det gjeld innsamlinga til dei heilage, skal de gjera det på same måten som eg gav påbod om til kyrkjelydane i Galatia.

²Fyrste dagen i veka skal kvar av dykk leggja til sides heime hjå seg sjølv det han får lukke til, så innsamlinga ikkje skal ta til fyrst når eg kjem.

³Når eg så kjem, skal eg senda dei som de har valt til det, med brev, og dei skal føra gåva dykkar til Jerusalem.

⁴Og skulle det syna seg best at eg òg reiser, kan dei fara saman med meg.

⁵Eg kjem til dykk når eg har vore i Makedonia; for Makedonia skal eg gjennom.

⁶Men hjå dykk vert eg nok verande ei tid, kanskje vinteren over. Så kan de rusta meg ut til ferda vidare, kvar ho så går.

⁷Denne gongen vil eg ikkje koma til dykk berre for nokre dagar, men eg vonar å kunna stogga ei tid, om Herren gjev meg lov.

⁸I Efesos vil eg drya til pinse.

⁹Her står døra vidopen for meg til ei rik verksemd, og det er mange motstandarar.

¹⁰Når Timoteus kjem, må de syta for at han kan kjenna seg trygg hjå dykk. Han gjer Herrens gjerning liksom eg.

¹¹Difor skal ingen sjå ned på han. Hjelp han i veg, og lat han fara med fred, så han kan koma til meg. Eg og brørne ventar på han.

¹²Når det gjeld Apollos, bror vår, har eg bede han inderleg at han må fara til dykk saman med dei andre brørne. Men han er slett ikkje viljug til å reisa no; han kjem så snart han får høve til det.

¹³Ver vakne, og stå faste i trua! Ver djerve og sterke!

¹⁴Lat alt de gjer, gå føre seg i kjærleik!

¹⁵Endå ein ting legg eg dykk på hjarta, brør. De veit at huslyden til Stefanas var dei fyrste som vart vunne i Akaia, og at dei har vigt seg til å tena dei heilage.

¹⁶De òg må retta dykk etter slike som dei, og etter kvar medarbeidar som gjer si gjerning.

¹⁷Eg gleder meg over at Stefanas og Fortunatus og Akaikus er komne. Det har vege opp saknet av dykk.

¹⁸For dei har sett nytt mot både i meg og dykk. Menn som dei skal de syna vørdnad.

¹⁹Kyrkjelydane i Asia helsar dykk. Akvilas og Priska og kyrkjelyden som samlast heime hjå dei, helsar dykk hjarteleg i Herrens namn.

²⁰Alle brørne her sender si helsing. Helsa kvarandre med ein heilag kyss!

²¹Eg, Paulus, skriv mi helsing med eiga hand.

²²Om nokon ikkje elskar Herren, han vere bannstøytt! Marana ta! [15]

²³Herren Jesu nåde vere med dykk!

²⁴Min kjærleik er med dykk alle i Kristus Jesus.