Read nynorsk 1978 1. Korintar 6 Bible Online

1. Korintar 6 - nynorsk 1978 bible

1. Korintar 6

¹Når ein av dykk har sak mot ein bror, korleis kan han då våga å leggja henne fram for heidningar og ikkje for dei heilage?

²Veit de ikkje at dei heilage skal døma verda? Og dersom verda skal dømast av dykk, er de ikkje då verdige til å døma i dei minste saker?

³Veit de ikkje at vi skal døma englar? Då må de kunna døma i saker som har med dette livet å gjera.

⁴Men når de har slike saker, korleis kan de då setja folk som kyrkjelyden ser ned på, til domarar?

⁵De skulle skjemmast! Finst det ikkje eit einaste vitug menneske hjå dykk som kan skifta rett mellom brørne sine?

⁶Nei, bror fører sak mot bror, og det for vantruande domarar.

⁷Det er i det heile eit nederlag for dykk at de har rettssaker med kvarandre. Kvifor lid de ikkje heller urett? Kvifor lid de ikkje heller tap?

⁸Men de gjer urett og lèt andre lida tap — og det jamvel brør.

⁹Veit de ikkje at dei som gjer urett, ikkje skal arva Guds rike? Far ikkje vilt! Korkje horkarar, avgudsdyrkarar, ekteskapsbrytarar, eller menn som ligg med menn eller lèt seg bruka til dette,

¹⁰korkje tjuvar, pengekjære, drikkarar, spottarar eller ransmenn skal arva Guds rike.

¹¹Somme av dykk var ein gong slike. Men de har late dykk vaska, de er helga, ja, rettferdige for Gud i Herren Jesu Kristi namn og ved vår Guds Ande.

¹²Alt har eg lov til, men ikkje alt gagnar. Alt har eg lov til, men eg skal ikkje la noko få makt over meg.

¹³Maten er til for magen og magen for maten; men Gud skal gjera ende på dei begge. Lekamen er ikkje for hor; han er for Herren, og Herren er for lekamen.

¹⁴Gud reiste Herren opp frå dei døde, og ved si kraft skal han òg reisa oss opp.

¹⁵Veit de ikkje at lekamane dykkar er Kristi lemer? Skal eg då ta Kristi lemer og gjera dei til skjøkjelemer? Langt ifrå!

¹⁶Eller veit de ikkje at den som held seg til ei skjøkje, er éin lekam med henne? Det er sagt: «Dei to skal vera eitt.»

¹⁷Men den som held seg til Kristus, er éi ånd med han.

¹⁸Hald dykk frå hor! All synd som eit menneske elles gjer, er utanfor kroppen. Men den som driv hor, syndar mot sin eigen kropp.

¹⁹Veit de ikkje at lekamen dykkar er eit tempel for Den Heilage Ande, som bur i dykk, han som de har frå Gud? De er ikkje lenger dykkar eigne:

²⁰De er kjøpte, og prisen er betalt. Bruk då lekamen til ære for Gud!