Read nynorsk 1978 2. Korintar 3 Bible Online

2. Korintar 3 - nynorsk 1978 bible

2. Korintar 3

¹Tek vi no atter til å gje oss sjølve lovord? Eller treng vi, som visse andre, tilrådingsbrev frå dykk eller til dykk?

²Nei, de er sjølve vårt tilrådingsbrev, skrive i hjarto våre, kjent og lese av alle menneske.

³For de syner dykk som Kristi brev, eit brev som har vorte til ved vår teneste. Det er ikkje skrive med blekk, men med den levande Guds Ande, ikkje på steintavler, men i menneskehjarto.

⁴Denne overtydinga har vi i Kristus, for Guds åsyn.

⁵Ikkje så at vi av oss sjølve duger til dette; vi kan ikkje tenkja ut noko, som om det kom frå oss. Nei, vår dugleik er av Gud,

⁶han som gjorde oss til tenarar for ei ny pakt, som ikkje byggjer på bokstav, men på Ande. For bokstaven slår i hel, men Anden gjer levande.

⁷Den tenesta som var føreskriven med bokstavar hogne i stein, var ei dødens teneste. Likevel var ho omgjeven av ein slik herlegdom at israelittane ikkje kunne sjå Moses i andletet; så sterk var glansen frå det, endå det var ein glans som kvarv.

⁸Kor mykje større herlegdom har ikkje då Andens teneste?

⁹For hadde fordømingstenesta herlegdom, så må rettferdstenesta vera endå mykje rikare på herlegdom.

¹⁰Ja, det som den gongen var omgjeve av herlegdom, har mist all herlegdomen sin. For no er det kome ein herlegdom som er så mykje, mykje større.

¹¹For når det som kvarv, var herleg, kor mykje herlegare må ikkje det vera som vert ståande?

¹²Sidan vi no har slik ei von, går vi fram med stort frimod.

¹³Vi gjer ikkje som Moses, han som la eit sveip over andletet, så israelittane ikkje skulle sjå den kvervande glansen før han var borte.

¹⁴Men dei vart forherda. For heilt til denne dag ligg dette sveipet der når dei les frå bøkene i den gamle pakta. Og dei ser ikkje at pakta er avlyst i Kristus.

¹⁵Ja, heilt til denne dag ligg det eit sveip over hjarta deira når Moses vert lesen.

¹⁶Men når dei vender om til Herren, vert sveipet bortteke.

¹⁷Herren er Anden, og der Herrens Ande er, der er fridom.

¹⁸Men vi som med usveipt åsyn ser Herrens herlegdom som i ein spegel, vi vert alle omlaga til det same biletet, frå herlegdom til herlegdom. Dette skjer ved Herrens Ande.