Read nynorsk 1978 2. Korintar 6 Bible Online

2. Korintar 6 - nynorsk 1978 bible

2. Korintar 6

¹Som hans medarbeidarar legg vi dykk på hjarta at de ikkje til unyttes må ta imot Guds nåde.

²For han seier: I rette tid bønhøyrde eg deg, på frelsesdagen hjelpte eg deg. Sjå, no er den rette tid, no er frelsesdagen!

³Og vi vil ikkje gje menneske grunn til å støyta seg på noko, så tenesta ikkje skal verta spotta.

⁴I alt viser vi oss som Guds tenarar: med tolmod i trengsler, i naud og i angst,

⁵under slag, i fengsel og i opprør, i hardt arbeid, i nattevòke og svolt.

⁶Vi går fram med reinleik og visdom, med langmod og godleik, i Den Heilage Ande, med kjærleik utan svik,

⁷med sannings ord og i Guds kraft, med rettferds våpen i høgre og venstre hand,

⁸i ære og vanære, om vi får lastord eller lovord. Dei seier at vi fører folk vilt, men vi talar sant,

⁹vi er ukjende, men kjende av alle, vi er døyande, og sjå, vi lever! Vi vert slegne, men ikkje ihelslegne,

¹⁰vi syrgjer, men er alltid glade, vi er fattige, men gjer mange rike, vi har ingen ting, men eig alt.

¹¹Vi har tala rett ut til dykk, korintarar, de har stort rom i hjarta vårt.

¹²De har det ikkje trongt hjå oss; det er i dykkar hjarta det er trongt.

¹³Men gjev oss likt for likt — eg talar som til born: Vidka de òg ut hjarto dykkar!

¹⁴Gå ikkje i framandt åk med vantruande! For kva har rettferd med urett å gjera, og kva samfunn har ljos med mørker?

¹⁵Korleis kan Kristus og Beliar semjast? Kva sameinar ein truande og ein vantru? [8]

¹⁶Korleis kan Guds tempel og avgudane forlikast? For vi er den levande Guds tempel. Gud har då sagt: Eg vil bu og ferdast mellom dei; eg vil vera deira Gud, og dei skal vera mitt folk.

¹⁷Difor seier Herren: Dra bort frå dei, og skil dykk frå dei, ikkje rør noko ureint! Då vil eg ta imot dykk;

¹⁸eg vil vera ein far for dykk, og de skal vera mine søner ¬og døtrer, seier Herren, Den Allmektige.