Read nynorsk 1978 Galatarane 4 Bible Online

Galatarane 4 - nynorsk 1978 bible

Galatarane 4

¹Lat meg forklara dette. Så lenge ein arving er umyndig, er det ingen skilnad på han og trælen, endå han er herre over heile eigedomen.

²Han står under formyndarar og hushaldarar til den tid far hans har fastsett.

³Såleis var det med oss òg. Då vi var umyndige, var vi trælar under grunnkreftene i verda. [8]

⁴Men då tida var fullkomen, sende Gud Son sin, fødd av ei kvinne, fødd under lova.

⁵Han skulle kjøpa dei frie som var under lova, så vi kunne få barnekår.

⁶Og sidan de er born, har Gud gjeve sin Sons Ande i hjarto våre, og Anden ropar: «Abba, Far!»

⁷Difor er du ikkje lenger træl, men son. Og er du son, då er du òg arving, innsett av Gud.

⁸Den tid de ikkje kjende Gud, træla de under gudar som i røynda ikkje er gudar.

⁹Men no når de kjenner Gud, ja, det som meir er, når de er kjende av Gud, korleis kan de no på nytt venda attende til desse veike og fattigslege grunnkreftene i verda? Vil de atter træla under dei?

¹⁰De aktar nøye på dagar og månader, høgtider og år. [9]

¹¹Eg er redd at alt strevet mitt med dykk har vore fåfengt.

¹²Eg bed dykk, brør: Ver som eg, for eg har vorte som de. De har ikkje gjort meg urett.

¹³De veit då korleis det gjekk til at eg forkynte evangeliet for dykk fyrste gongen. Det kom av at eg var sjuk.

¹⁴Men de lét dykk ikkje freista av dette til å vanvørda eller avsky meg; de tok imot meg som ein engel frå Gud, ja, som Kristus Jesus sjølv.

¹⁵Har de gløymt kor glade de var då? Det vitnemålet gjev eg dykk at de gjerne hadde rive ut augo og gjeve meg, om det var mogeleg.

¹⁶Har eg no vorte ein fiende fordi eg seier dykk sanninga?

¹⁷Dei andre er etter dykk med ein iver som ikkje er av det gode. Men dei vil skilja dykk ut og gjera dykk til sine tilhengjarar.

¹⁸Det er vel og bra at somme legg iver for dagen, og ikkje berre når eg er hjå dykk, men det må alltid vera ein iver for det gode.

¹⁹Mine born, som eg atter føder med smerte til dess Kristus vinn skapnad i dykk!

²⁰Eg skulle ynskja eg var hjå dykk så eg kunne tala til dykk på ein annan måte, for eg er reint i beit med dykk.

²¹Sei meg, de som vil vera under lova: Høyrer de ikkje på lova?

²²Det står skrive at Abraham hadde to søner, ein med trælkvinna og ein med den frie kvinna.

²³Son til trælkvinna er fødd på vanleg måte, son til den frie kvinna er fødd etter Guds lovnad.

²⁴Dette har ei djupare meining. Dei to kvinnene står for to pakter. Den eine, Hagar, er pakta frå Sinai-fjellet; ho føder til trældom.

²⁵Hagar står for Sinai-fjellet i Arabia og svarar til det Jerusalem som no er, og det lever i trældom med sine born. [10]

²⁶Men det Jerusalem som er der oppe, er fritt, og det er mor vår. For det står skrive:

²⁷Gled deg, du barnlause, ¬som ikkje fødde. Set i og jubla, ¬du som ikkje hadde rier. For den einslege kvinna ¬har fleire born enn ho som har mann.

²⁸Og de, brør, er born etter lovnaden liksom Isak.

²⁹Men han som var fødd på vanleg måte, forfylgde den gongen han som var fødd i kraft av Anden, og slik er det i dag òg.

³⁰Men kva seier Skrifta? Jag ut trælkvinna og son hennar! For son til trælkvinna skal ikkje arva saman med son til den frie kvinna.

³¹Difor, brør, er vi ikkje born åt trælkvinna, men åt den frie kvinna.