Read nynorsk 1978 Galatarane 5 Bible Online

Galatarane 5 - nynorsk 1978 bible

Galatarane 5

¹Til fridom har Kristus frigjort oss. Stå difor støtt og lat ikkje nokon tvinga dykk inn att under trældoms åk.

²Eg, Paulus, seier dykk: Lèt de dykk omskjera, vil Kristus inkje gagna dykk.

³Atter slår eg fast at kvar den som lèt seg omskjera, er skuldig til å halda heile lova.

⁴De som vil verta rettferdige for Gud ved lova, de er skilde frå Kristus, de er falne ut or nåden.

⁵Men vi held oss til trua og ser ved Anden fram mot den rettferd som er vår von.

⁶For i Kristus Jesus gjer det korkje frå eller til om ein er omskoren eller uomskoren; her gjeld berre tru, verksam i kjærleik.

⁷De var komne godt i gang med laupet. Kven er det som har hindra dykk i å vera lydige mot sanninga?

⁸Han som kalla dykk, har ikkje overtalt dykk til dette.

⁹Litt surdeig syrer heile deigen.

¹⁰Men Herren gjev meg den tiltru til dykk at de ikkje vil tenkja annleis enn eg. Den som forvirrar dykk, skal få sin dom, kven han så er.

¹¹Om det er så, brør, at eg no òg forkynner omskjering, kvifor vert eg då forfylgd? Då er ikkje krossen ein støytestein lenger.

¹²Måtte dei berre skamskjera seg, dei som set dykk opp!

¹³De er kalla til fridom, brør. Lat berre ikkje fridomen verta eit påskot for den syndige naturen, men ten kvarandre i kjærleik.

¹⁴For heile lova kan samanfattast i det eine bodet: Du skal elska nesten din som deg sjølv.

¹⁵Men når de bit og glefser etter kvarandre, så ta dykk i vare at de ikkje et kvarandre opp.

¹⁶Eg seier dykk: Lev eit liv i Anden! Då gjer de ikkje det som den syndige naturen trår etter.

¹⁷For det vår vonde natur trår etter, er Anden imot, og det Anden trår etter, er vår vonde natur imot. Dei to ligg i strid, så de ikkje er i stand til å gjera det de vil.

¹⁸Men vert de drivne av Anden, då er de ikkje under lova.

¹⁹Det er klårt kva som kjem frå vår vonde natur: hor, umoral, sedløyse,

²⁰avgudsdyrking, trolldom, fiendskap, strid, avund, sinne, sjølvhevding, usemje, partistrid,

²¹misunning, drikk, svir og meir av det slaget. Som eg før har sagt: Dei som fer med slikt, skal ikkje arva Guds rike.

²²Men Andens frukt er kjærleik, glede, fred, langmod, mildskap, godleik, truskap,

²³spaklynde og sjølvtøyming. Mot slike ting er ikkje lova.

²⁴Dei som høyrer Kristus til, har krossfest den vonde naturen med lidenskapane og lystene.

²⁵Har vi fått livet ved Anden, så lat oss òg ferdast i Anden.

²⁶Lat oss ikkje vera drivne av æresykje, så vi eggjar kvarandre og misunner kvarandre.