Read nynorsk 1978 Galatarane 6 Bible Online

Galatarane 6 - nynorsk 1978 bible

Galatarane 6

¹Brør, skulle einkvan verta gripen i eit feilsteg, så må de som lever ved Anden, hjelpa han til rettes. Men gjer det med varsemd, og akta deg sjølv, så ikkje du òg vert freista.

²Ber børene for kvarandre, og oppfyll på den måten Kristi lov.

³Den som trur han er noko, men ingenting er, han lurer seg sjølv.

⁴Kvar skal prøva si eiga gjerning. Han skal ha si ros av det han sjølv har gjort, og ikkje sjå på dei andre.

⁵For kvar skal bera si eiga bør.

⁶Den som får opplæring i Ordet, skal dela alt godt med læraren sin.

⁷Far ikkje vilt! Gud lèt seg ikkje spotta. Det eit menneske sår, skal det òg hausta.

⁸Den som sår i sin syndige natur, skal hausta undergang av denne naturen; den som sår i Anden, skal hausta evig liv ved Anden.

⁹Lat oss gjera det gode og ikkje trøytna! Når tida kjem, skal vi hausta, berre vi ikkje gjev opp.

¹⁰Så lat oss gjera godt mot alle så lenge det er tid, og mest mot dei som er våre sysken i trua.

¹¹Sjå kor store bokstavar eg nyttar når eg no med mi eiga hand skriv til dykk!

¹²Dei som vil tvinga dykk til omskjering, er slike som vil ta seg godt ut mellom menneske, så dei skal sleppa verta forfylgde for Kristi kross.

¹³For dei som lèt seg omskjera, held ikkje lova sjølve; men dei vil at de skal omskjerast, så dei kan skryta av det som er gjort med dykk på kroppen.

¹⁴Men eg vil aldri rosa meg av noko anna enn av vår Herre Jesu Kristi kross. Ved den er verda krossfest for meg, og eg for verda.

¹⁵For det som tel, er korkje å vera omskoren eller uomskoren, men å vera ein ny skapning.

¹⁶Fred og miskunn vere med dei som har dette til rettesnor, og over Guds Israel!

¹⁷Heretter må ingen valda meg møde meir, for eg ber Jesu merke på lekamen min. [11]

¹⁸Vår Herre Jesu Kristi nåde vere med dykkar ånd, brør! Amen.