Read nynorsk 1978 Efesarane 2 Bible Online

Efesarane 2 - nynorsk 1978 bible

Efesarane 2

¹De var ein gong døde på grunn av misgjerningane og syndene dykkar.

²De levde i dei på denne verdsens vis og lét dykk leia av hovdingen i himmelrømda, den ånd som no verkar i dei ulydige. [2]

³Ja, ein gong levde vi alle som dei. Vi fylgde lystene i vår syndige natur og lét oss leia av den og av våre eigne tankar. Og vi var av naturen under Guds vreide liksom alle dei andre.

⁴Men Gud er rik på miskunn. Av di han elska oss med så stor kjærleik,

⁵gjorde han oss levande med Kristus, vi som var døde på grunn av våre synder. Av nåde er de frelste.

⁶I Kristus Jesus har han reist oss opp frå døden saman med han og sett oss i himmelen med han,

⁷så han i dei komande tider kunne visa sin overstrøymande rikdom på nåde og sin godleik mot oss i Kristus Jesus.

⁸For av nåde er de frelste, ved tru. Det er ikkje dykkar eige verk, det er Guds gåve.

⁹Og det kviler ikkje på gjerningar, så ingen skal rosa seg.

¹⁰For vi er hans verk, skapte i Kristus Jesus til gode gjerningar som Gud føreåt har lagt ferdige, så vi skulle ferdast i dei.

¹¹De var ein gong heidningar og vart kalla uomskorne av dei som kallast dei omskorne, dei som er omskorne på kroppen av menneskehand.

¹²Kom i hug at de den gongen var utan Kristus, utestengde frå borgarrett i Israel, utan del i paktene og lovnaden og difor utan von og utan Gud i verda.

¹³Men no, i Kristus Jesus, er de som før var langt borte, komne nær ved Kristi blod.

¹⁴For han er vår fred, han som gjorde dei to til eitt og reiv ned det gjerdet som skilde, fiendskapen. [3]

¹⁵Då han gav sin lekam, avlyste han lova med hennar bod og føresegner. Såleis skulle han gjera fred og skapa dei to til eitt nytt menneske.

¹⁶I ein lekam skulle han forsona dei begge med Gud då han døydde på krossen og der gjorde ende på fiendskapen.

¹⁷Og han kom og forkynte den gode bodskapen om fred for dykk som var langt borte, og fred for dei som var nær.

¹⁸Ved han har vi begge tilgjenge til Faderen i ein Ande.

¹⁹Så er de ikkje lenger framande og utlendingar, men de er borgarar saman med dei heilage og høyrer Guds husfolk til.

²⁰De er oppbygde på apostel- og profetgrunnvollen, men hjørnesteinen er Kristus Jesus sjølv.

²¹Han held heile bygningen saman, så han i Herren veks til eit heilagt tempel,

²²og ved han vert de òg bygde opp til ein bustad for Gud i Anden.