Read nynorsk 1978 Efesarane 3 Bible Online

Efesarane 3 - nynorsk 1978 bible

Efesarane 3

¹Difor bøyer eg mine kne, eg, Paulus, som no er Jesu Kristi fange for dykkar skuld, de heidningar.

²De har høyrt om den nåden Gud har gjeve meg, at eg skal vera ein hushaldar hjå dykk over den løyndomen

³som vart kunngjord for meg i ei openberring. Dette har eg med nokre få ord skrive om ovanfor.

⁴Og når de les det, kan de skjøna kor vel eg kjenner Kristi løyndom.

⁵I farne ætter fekk ikkje menneska vita om denne løyndomen, men no har han ved Anden vorte openberra for hans heilage apostlar og profetar:

⁶at heidningane er medarvingar; dei høyrer med til same lekamen og har del i lovnaden — i Kristus Jesus og ved evangeliet.

⁷Og eg vart ein tenar for evangeliet då Gud greip inn med si kraft og gav meg si nådegåve.

⁸Eg som er den ringaste av dei heilage, har fått den nåde å forkynna for folkeslaga den glade bodskapen om Kristi ufattelege rikdom

⁹og føra Guds frelsesplan fram i ljoset, den løyndomen som frå evig tid har vore løynd hjå Gud, han som skapte alt.

¹⁰Såleis skulle hans mangfaldige visdom kunngjerast gjennom kyrkja for maktene og herredøma i himmelrømda.

¹¹Dette hadde Gud sett seg føre frå evig tid, og no har han fullført det i Kristus Jesus, vår Herre.

¹²I han har vi frimod, og i trua på han kan vi koma fram for Gud med tillit.

¹³Difor bed eg dykk: Miss ikkje motet om eg lyt lida for dykkar skuld. Det er ei ære for dykk!

¹⁴Difor bøyer eg mine kne for Faderen,

¹⁵han som har gjeve namn til alt som heiter far og born i himmel og på jord.

¹⁶Eg bed om at han som er så rik på herlegdom, må styrkja dykkar indre menneske med si kraft og sin Ande,

¹⁷så Kristus ved trua kan bu i hjarto dykkar, og de kan vera rotfeste og grunnfeste i kjærleik.

¹⁸Då skal de saman med alle dei heilage maktast å fatta breidd og lengd, høgd og djupn,

¹⁹ja, kjenna heile Kristi kjærleik som er større enn nokon kan skjøna, og verta fylte med all Guds fullnad.

²⁰Han som verkar i oss med si kraft og kan gjera så mykje meir enn alt det vi bed om og skjønar,

²¹han skal ha ære i kyrkjelyden og i Kristus Jesus gjennom alle ætter og i alle æver! Amen.