Read nynorsk 1978 Efesarane 5 Bible Online

Efesarane 5 - nynorsk 1978 bible

Efesarane 5

¹Ha Gud til førebilete, de som er hans kjære born.

²Lev i kjærleik, liksom Kristus elska oss og gav seg sjølv for oss som ei gåve og eit offer, Gud til ein hugnadleg ange.

³Hor, alle slag ureinskap og havesykje må ikkje eingong nemnast mellom dykk; slikt sømer seg ikkje for kristne.

⁴Rått snakk, dumt prat og grovt skjemt er òg uhøveleg. Sei heller Gud takk!

⁵For det skal de vita at ingen som driv hor eller lever i umoral, skal få vera med i Guds og Kristi rike, heller ikkje den som er havesjuk, for han er ein avgudsdyrkar.

⁶Lat ingen narra dykk med tome ord, for det er slikt som gjer at Guds vreide kjem over dei ulydige.

⁷Ha ikkje noko sams med dei!

⁸Ein gong var de sjølve mørker, men no — i Herren — er de ljos. Lev då som born av ljoset!

⁹For fruktene av ljoset er godleik, rettferd og sanning.

¹⁰Prøv då kva som er til hugnad for Herren!

¹¹Ver ikkje med på dei gjerningane som høyrer mørkret til, for dei er utan frukt; refs heller.

¹²Det som slike folk driv med i løynd, er det ei skam berre å nemna.

¹³Men alt kjem for dagen når ljoset får avsløra det,

¹⁴og alt som kjem for dagen, er ljos. Difor heiter det: Vakna, du som søv, stå opp frå dei døde, og Kristus skal lysa for deg.

¹⁵Pass difor nøye på korleis de lever, ikkje som ukloke, men som kloke,

¹⁶så de kjøper den laglege tida, for dagane er vonde.

¹⁷Ver ikkje uvituge, men skjøna kva det er Herren vil.

¹⁸Drikk dykk ikkje fulle av vin; det fører til ageløyse. Men vert fylte av Anden,

¹⁹og lat salmar og hymner og åndelege songar lyda mellom dykk; syng og spel av hjarta for Herren!

²⁰Takk alltid Gud og Faderen for alle ting i vår Herre Jesu Kristi namn!

²¹Ver kvarandre underordna i age for Kristus.

²²Dei gifte kvinnene skal underordna seg under mennene sine som under Herren sjølv.

²³For mannen er hovudet for kvinna liksom Kristus er hovudet for kyrkja; han er frelsar for lekamen sin.

²⁴Liksom kyrkja underordnar seg Kristus, skal ei kvinne underordna seg mannen sin i alle ting.

²⁵De menn skal elska konene dykkar, liksom Kristus elska kyrkja og gav seg sjølv for henne,

²⁶så han kunne helga henne og reinsa henne med vassbadet i kraft av eit ord.

²⁷På den måten ville han stella henne fram for seg i herlegdom utan flekk eller rukke eller noko slikt; heilag og lytelaus skulle ho vera.

²⁸På same måten skal mennene elska konene sine som sin eigen lekam. Den som elskar kona si, elskar seg sjølv.

²⁹Ingen har nokon gong hata sin eigen kropp, tvert om gjev han kroppen næring og tek seg av han på same måten som Kristus gjer med kyrkja.

³⁰For vi er lemer på hans lekam.

³¹Difor skal mannen skiljast frå far sin og mor si og halda seg til kona si, og dei to skal vera eitt.

³²Dette er eit stort mysterium; no tenkjer eg på Kristus og kyrkja.

³³Men det gjeld dykk òg: Kvar og ein skal elska kona si som seg sjølv, og ho skal ha age for mannen sin.