Read nynorsk 1978 Efesarane 6 Bible Online

Efesarane 6 - nynorsk 1978 bible

Efesarane 6

¹De born skal vera lydige mot foreldra dykkar for Herrens skuld, for det er rett.

²Æra far din og mor di, dette er det fyrste bodet med lovnad:

³så det kan gå deg vel og du får leva lenge i landet.

⁴De fedrar, vekk ikkje sinne og trass hjå borna, men gjev dei den oppseding og rettleiing som er etter Herrens vilje.

⁵De trælar skal vera lydige mot dykkar jordiske herrar, med otte og age og av eit ærleg hjarta som mot Kristus sjølv.

⁶Ver ikkje augnetenarar, som berre vil gjera menneske til lags, men Kristi tenarar som heilhjarta gjer Guds vilje.

⁷Ver ihuga i tenesta, som var det for Herren og ikkje for menneske.

⁸De veit at kvar og ein skal få løn av Herren for det gode han gjer, anten han er fri eller træl.

⁹Det same skal de herrar gjera mot trælane. Lat vera å truga! De veit at både dei og de har same Herren i himmelen, og han gjer ikkje skil på folk.

¹⁰Til sist: Vert sterke i Herren og i hans veldige kraft!

¹¹Ta Guds fulle rustning på, så de kan stå dykk mot djevelens lumske åtak.

¹²For vi har ikkje strid mot kjøt og blod, men mot makter og herredøme, mot verdsens herrar i dette mørkret, mot vondskapens åndehær i himmelrømda.

¹³Ta difor Guds fulle rustning på, så de kan gjera motstand på den vonde dagen, vinna over alt og verta ståande.

¹⁴Så stå då med sanninga til belte om livet og rettferda til brynje,

¹⁵og lat fredens evangelium gjera dykk budde til å gå i strid.

¹⁶Ta framfor alt trua til skjold! Med det kan de sløkkja alle gloande piler frå den vonde.

¹⁷Og ta frelsehjelmen og Andens sverd som er Guds ord.

¹⁸Gjer dette i bøn, og legg alt fram for Gud! Bed alltid, i Anden! Vak og hald ut i bøn for alle dei heilage.

¹⁹Bed for meg òg, at eg må få dei rette ord når eg skal tala, så eg med frimod kan forkynna løyndomen i evangeliet,

²⁰som eg er sendebod for her i fengslet òg. Bed om at eg ved evangeliet må få frimod til å tala som eg skal.

²¹For at de òg skal få vita korleis eg har det og korleis det står til med meg, skal Tykikus fortelja dykk alt. Han er vår kjære bror og ein trufast Herrens tenar.

²²Eg sender han til dykk nett for at de skal få høyra korleis vi har det, og for at han skal gje dykk nytt mot.

²³Fred vere med brørne, og kjærleik og tru frå Gud, Faderen, og frå Herren Jesus Kristus!

²⁴Nåde og uforgjengeleg liv vere med alle som elskar vår Herre Jesus Kristus!